Uss èn ils cumpraders da l’hotel Waldhaus a Flem enconuschents: La Paval Holding (Rumenia) e la Apex Alliance (Lituania). Quai ha la vischnanca da Flem communitgà ensemen cun las duas interpresas. Tenor communicaziun disponan quellas d’experientscha internaziunala en l’hotellaria da luxus e lur plans da svilup persvadian. L’intenziun è da puspè avrir l’hotel da tschintg stailas en il decurs dal 2025.
Nus vulain adina respectar las ragischs da l'hotel e sia muntada per la regiun
L’hotel Waldhaus è la segund gronda cumpra da la Paval Holding suenter l’acquist dal Grand Hotel Gardone en l’Italia il 2023.
L’Apex Alliance da sia vart represchenta marcas da renum sco Hilton, Marriott e Radisson. Ils novs possessurs han l’intenziun da mantegnair il scharm unic dal ressort, inclusiv ses bajetgs istorics, sia ierta e ses mobigliar. Sco il president da la Paval Holding, Dragos Paval vegn cità en la communicaziun a las medias, saja planisà da modernisar l’infrastructura, ils sistems tecnics ed ulteriuras empernaivladads. Ins veglia adina respectar las ragischs da l’hotel e sia muntada per la regiun.
Or da l'archiv:
