Igl èn stadas grondas novas l’onn passà a Flem: L’hotel Waldhaus è vendì. E quai a la Paval Holding ed Apex Alliance. Tuttas duas investuras èn da l'Europa da l’ost. Als frars Dragos ed Adrian Paval appartegna era Dedeman, il pli grond martgà da construcziun en la Rumenia. Ed ussa l'hotel da renum a Flem.
Il «nov» hotel Waldhaus dovra dapli plaz
Per che l’hotel possia prosperar, stoppia el avair dapli plaz, ha communitgà la vischnanca da Flem. Gia dapi l'entschatta hajan ils novs proprietaris gì interess da cumprar la parcella 4397. Quai è la parcella en il nord da l’hotel Waldhaus. Sin quella parcella sa chatta era la Waldhaus Arena cun la halla da curling. Per sa sviluppar dovra l’hotel dapli spazi per letgs supplementars. Cunquai ch’in contract en dretg da construcziun na vegnia betg en dumonda, vul la vischnanca vender la parcella per 4 milliuns francs.
I sa tracta d’investurs internaziunals, nua che l’instrument dal contract da dretg da construcziun, sco quai che nus al enconuschain, n’è betg uschè enconuschent.
Enstagl d’in dretg da construcziun hajan las partidas concludì in dretg da recumpra per la parcella. Quel giess en vigur, sche la nova cumpradra na duvrass betg la parcella per l’intent d’alloschament. Tenor il president communal da Flem, Christoph Schmidt, veglia l’investider Dragos Paval investir a lunga vista. Perquai hai duvrà in tschert temp per la planisaziun. Tenor ils novs proprietaris duai l’Hotel Waldhaus avrir sias portas la proxima stagiun d’enviern.
Revisiun parziala da la planisaziun locala: manaschis d’alloschament
La vischnanca da Flem prevesa ina revisiun parziala per garantir e sviluppar ulteriuramain ils manaschis d'alloschament, surtut ils hotels istorics a Flem Casa d’Uaul. Cun 576 cunter 267 vuschs ha la populaziun dà ses consentiment a la revisiun parziala da la planisaziun locala e l'adattaziun da la lescha da construcziun. Ina differenziaziun tranter las zonas d'alloschament A e B vegn fatga per proteger la substanza istorica ed empruvar novs svilups, uschia la vischnanca da Flem. Las mesiras hajan l'intent da rinforzar l'impurtanza turistica da la vischnanca da Flem e da garantir ils manaschis d'alloschament a lunga vista.
Nova biblioteca communala ed archiv communal
Plinavant ha la populaziun approvà cun 679 cunter 194 vuschs ils plans da construir ina nova biblioteca e da schlargiar l'archiv communal cun in credit da construcziun da 1'970'000 francs. La biblioteca existenta e l'archiv communal sajan tenor la vischnanca antiquads. Las novas installaziuns duain ademplir ils basegns moderns e rinforzar l'attracziun dal lieu. La nova construcziun vegn concepida sco pavigliun cun in'architectura pli averta.
Il project è vegnì sviluppà da Spreiter Architekten. Sch’il suveran di Gea, po la construcziun cumenzar l'atun 2025 ed esser terminada fin l'atun 2026. Il project haja l'intenziun da rinforzar la biblioteca sco lieu d'inscunter cultural e da garantir l'archivaziun segira e confurma a las normas da l'archiv communal per proteger documents istorics impurtants, uschia la vischnanca.
Nova senda per velos da muntogna «Foppatrail»
La vischnanca da Flem planisescha la construcziun da la senda per velos da muntogna tranter Foppa e la staziun sut da Flem. Il credit da construcziun per il «Foppatrail» munta a CHF 750'000.- e vegn finanzià principalmain tras il fond d'infrastructura da la Flem SA. Cun 631 cunter 241 vuschs han ils e las da Flem approvà quest project. La senda è planisada sco simpel «trail» per principiants. Las lavurs duain cumenzar la stad 2025 e vegnir terminadas l'atun 2025. L’Arena Alva surpiglia la gestiun ed il mantegniment dal trail.