La dismessa da rument è ina chaussa che las vischnancas en Surselva han surdà a la regiun Surselva. Lezza pretenda ina taxa per quella lavur. La vischnanca da Mustér ha in agen sistem da quintar las taxas. Fin uss eran quellas fixas per chasada e na cuvrivan la finala betg ils custs, che la deponia communala e l’entira investiziun en, per exempel, molocs custa. Uschia sa resultava annualmain in deficit en chaussa. Quai stueva vegnir adattà, pertge ils custs na dastgan betg surpassar las entradas. Cun il nov sistem da taxaziun, egual a quel da la regiun Surselva, po quai vegnir cuntanschì, uschia la suprastanza communala.
Sistem da taxas ha persvas
La regiun Surselva fa gia blera lavur, cun eruir tge vischnanca che ha da pajar quant. Mustér ha en l’avegnir il medem sistem da quintar e po uschia spargnar custs administrativs. E cun las taxas actualas pon vegnir fatgas las mesiras en l’infraststructura ed era finanziar la deponia. Lezza vegn en l’avegnir ad avair ina pressa ed ina stadaira, per che mintga chaschunader da rument, possia era gist pajar quel. Quai era ina da las grondas discrepanzas da la lescha veglia, che mintg’in aveva da pajar tuttina, era sch’el na chaschunava betg ils medems quantums rument, quai vegnia a sa midar en futur, uschia il suprastant Paul Schmidt.
La finala ha surtut la debatta d’entrada dà dapli da discussiunar e quai surtut las replicas dal survegliader da pretschs. Lez aveva recumandà a la vischnanca da distinguer pli en detagl las abitaziuns pitschnas, e da pretender ina taxa sin rument verd. Ma quai na fetschia la regiun era betg, e perquai hajan els sco vischnanca intervegnì en chaussa e pretendì in scleriment dal survegliader da pretschs. Lez ha argumentà che quai saja surtut ina recumandaziun e betg in cumond ed el possia sustegnair la lescha actuala. Sch’il referendum facultativ na vegn betg prendì, alura entra la lescha nova en vigur cun l’entschatta dal 2023.
Duas giadas «GEA» a la revisiun da la planisaziun locala
Dus projects turistics han survegnì sustegn dal parlament communal. Uschia è la revisiun da la planisaziun locala en connex cun la punt pendenta a Sontga Gada, vegnida approvada unanimamain. En quest connex è surtut vegnì discutà sur da las sendas da gianellas e betg sur da la punt pendenta. Era la scursalera, planisada en il territori da skis ha survegnì glisch verda dal cussegl communal. L’Uffizi d’ambient ha admonì ch’in dutg stoppia vegnir integrà en il plan da zonas. Questa midada dovra ina votaziun a l’urna. Lezza duai succeder ils 15 da matg. Las ulteriuras midadas en connex cun las midadas dal plan da zonas na basegnan betg ina votaziun a l’urna.
