L’idea da nizzegiar il territori a Mustér per ir cun skis era vegnida da l'interprendider indigen Pius Condrau e da l’investider tudestg Heinz Capelle. Durant in’excursiun hajan els scuvert quest territori, hai num. Alura han els, ensemen cun Professer Walter Wittmann ed il president da l’Uniun da cura Alexi Sialm, fundà in comité d’iniziativa per realisar lur visiun.
Impressiuns d'avant 50 onns
-
Bild 1 von 7Legenda: Plazzal a Caischavedra. mad -
Bild 2 von 7Legenda: Plazzal a Caischavedra. mad
-
Bild 3 von 7Legenda: Plazzal a Lai Alv. mad
-
Bild 4 von 7Legenda: Plazzal a S. Catrina. mad
-
Bild 5 von 7Legenda: Lai Alv ils emprims onns da manaschi. mad
-
Bild 6 von 7Legenda: Ir cun skis a Gendusas. mad
-
Bild 7 von 7Legenda: Festa en ils Parlets. mad
Insatge incredibel
Ignaz Deflorin da Mustér aveva 15 onns, cura che las pendicularas han avert il territori da skis. Perquai ch'el era stà ad alp en la cuntrada, aveva el vis, co ils lavurers planavan la pista cun grondas maschinas .
Quai deva ina tensiun, in tschaffen a mai da sa preparar per ir cun skis.
A partir da l'enviern da 1971/72 pudevan scolaras e scolars ir cun skis cun la «bédé» – co ils indigens numnan las pendicularas da Mustér. Uschia na stuevan els betg pli far pistas a pe ubain ir cun in pitschen runal. Las sondas, dumengias e mesemnas suentermezdi gievan ils blers sin pista, e quai fin ch'ils runals serravan.
Jau na sai betg, danunder ch'ins prendeva la cundiziun. Ma quai era belleza.
La passiun è restada. Fin oz va Ignaz Deflorin cun skis en il territori da Caischavedra – Parlets – Piz Aut.
Svilups en il territori da skis
Dapi il 2014 è l’investider Marcus Weber acziunari principal da las pendicularas da Mustér. Dapi lura marscha bler. Uschia ha el realisà il resort Catrina, sco er in'ulteriura pendiculara da Salins sin il Cuolm da Vi. Era l’ennavaziun – ch’era fin lura dal tut natirala – è ussa artifiziala sin ina part dal territori. In'ulteriura finamira fiss d’ennavar las pistas che mainan da Caischavedra fin en il vitg. Per quai veglian els turbinar l’aua per pudair profitar da l'indriz durant l'entira stagiun da skis, ha ditg il directur Stefan Arnold.
Il restaurant a Caischavedra vegn engrondì
En la gastronomia vesa il directur il pli grond potenzial da svilup. Uschia èsi planisà d’engrondir il restaurant a Caischavedra gia la stad proxima. Era sin il Cuolm da Vi duai dar in restaurant. Fin ussa mancan dentant las lubientschas necessarias.
Ina purschida da scarsolas
Plinavant vulan las pendicularas da Mustér realisar in trassé per scarsolas. Uschia vulan ellas attrair dapli famiglias cun uffants sco giasts futurs.