Strusch che la Lumnezia ha chattà in candidat per la suprastanza communala, datti gia la proxima demissiun. Quai è da leger en il Fegl uffizial da la Surselva.
Per l'elecziun dals 27 da november stat Gian Caduff da Morissen a disposiziun. El vul succeder a Martin Rupp ch'aveva demissiunà il matg – aifer il temp d'uffizi. Enfin oz aveva il suprastant Renzo Blumenthal surpiglià las incumbensas da la persuna vacanta.
Uss annunzia la vischnanca dentant er la demissiun immediata da Renzo Blumenthal ch'è en uffizi dapi la stad 2021 . Quai munta ch'in sez en suprastanza resta vacant. Blumenthal è gia il terz suprastant che sa retira anticipadamain da ses post en il decurs da la perioda d'uffizi 2021 fin 2024.
Envers la FMR ha il president communal Daniel Solèr punctuà che las demissiuns sajan succedidas per motivs persunals. I na saja betg uschia ch'els hajan dispita entaifer la suprastanza. La vischnanca Lumnezia funcziunia ed ella funcziunia fitg bain, uschia Solèr.
