La vendita da l'hotel cun bogn termal aveva avant 13 onns procurà per bleras emoziuns e discussiuns. Dapi lura era la situaziun dentant sa calmada. La vischnanca ha realisà cun ils raps empermess da Remo Stoffel ina halla polivalenta nova ed il bogn è oz en possess dad ina fundaziun.
Othmar Berni, il president communal, ha ditg envers la FMR ch'intgins puncts da la vendita da l'onn 2012 eran anc averts. Tranter quels era per exempel la midada da possess da duas parcellas che s'anflavan anc en possess da la vischnanca e ch'eran dentant part da la cunvegn da cumpra. Othmar Berni ha confirmà che la suprastanza haja liquidà quella fatschenta en atgna cumpetenza. Davart da la vischnanca saja il contract vegnì ademplì e l'amortisaziun dal pretsch da cumpra saja serrada giu.
Damai che la vendita da l'hotel ha occupà fermamain la populaziun, era il president da l'opiniun ch'ins stoppia infurmar la glieud. Tenor la suprastanza haja l'entira chaussa chattà ina fin cuntentaivla, damai che la halla polivalenta è bajegiada ed il bogn en possess d'ina fundaziun.