La halla polivalenta a Val è en funcziun dapi l'entschatta da l'onn 2021. Pervia da corona n'ha quai dentant betg dà in'inauguraziun uffiziala. Il di da las portas avertas, sonda ils 28 d'avust, è l'emprova da prender suenter quai. Lura po la populaziun visitar las localitads novas dal «Zentrum Glüs».
-
Bild 1 von 7. Il bajetg annex sper la halla polivalenta. Bildquelle: RTR, Linus Livers .
-
Bild 2 von 7. La scola veglia e la part nova cun il «Zentrum Glüs» gest dasper il Rain da Val. Bildquelle: RTR, Linus Livers .
-
Bild 3 von 7. La stanza da sedutas per divers dievers. Bildquelle: RTR, Linus Livers .
-
Bild 4 von 7. En questa halla èsi vegnì dà paisa ad ina buna acustica. Bildquelle: RTR, Linus Livers .
-
Bild 5 von 7. Quest'entrada po vegnir serrada e vala sco protecziun encunter aua gronda. Bildquelle: RTR, Linus Livers .
-
Bild 6 von 7. Passagi tranter las duas hallas. Bildquelle: RTR, Linus Livers .
-
Bild 7 von 7. Passagi da la halla veglia en la nova. Bildquelle: RTR, Linus Livers .
Istorgia
Dapi varga 30 onns èn ils da Val vid planisar ina halla polivalenta. Sco quai che Ralf Brot, il mainascola, ha raquintà haja el chattà plans per ina tala halla da sport en in truclet, e quai gia avant 20 onns cura ch’el ha cumenzà a dar scola a Val. Gia lura sajan quels plans stads passa 10 onns vegls. Stefan Schmid, il president da vischnanca da Val conferma ch'il giavisch per ina tala halla polivalenta saja varga 30 onns vegl.
Hotel Therme e «Zentrum Glüs»
Il «Zentrum Glüs» è daventà realitad perquai che la vischnanca da Val ha vendì il «Hotel Therme» a l'investider Remo Stoffel. La vendita ha purtà 12,3 milliuns francs en cassa da la vischnanca e quels èn vegnids investids en il «Zentrum Glüs».
En connex cun quella vendita aveva Remo Stoffel empermess a la vischnanca 6 milliuns francs per bajegiar ina tala halla. Alura avess dentant la mesadad da quella halla polivalenta tutgà a l'Hotel Therme, che sa numna oz «Hotel 7132». Era fissi stà da bajegiar quella halla «Im Boda», pia a l'entschatta dal vitg da Val gist sper l'hotel numnà. A la fin è tut vegnì auter che planisà. Remo Stoffel è sa retratg da quella idea da la halla communabla per la vischnanca e per l'hotel, enstagl da 6 milliuns ha el pajà 4,6 milliuns, persuenter tutga la halla ussa sulettamain a la vischnanca.
«Zentrum Glüs»
Quella surbajegiada è daventada in center perquai ch'ins ha integrà la pratica dal medi, localitads per fisioterapia e fitness e stanzas da seduta. Il nov tract è collià da la sala d’entrada cun in passagi che maina directamain da la halla nova vi en la halla veglia. L'ascensur en il tract nov pussibilitescha a persunas en sutga da rodas da cuntanscher mintga auzada en omadus tracts.