La vischnanca po sustegnair l'Andermatt-Sedrun Sport SA cun 100'000 francs. Naginas cuntravuschs ed er naginas dumondas en quai connex hai dà a la vischnanca communala da Tujetsch. A Valtgeva emprendan uffants e persunas cun pauc experientscha d'ir cun skis en il territori da skis da Sedrun. Sin l’areal gest sur la staziun da tren da Sedrun vegn construì ina ustaria nova per radund 2 milliuns francs ed il sistem da far naiv vegn optimà per circa 1,5 milliuns.
Il sustegn paja la vischnanca or dal fond per la promoziun da svilup economic. Sco il president communal Martin Cavegn ha orientà saja l’emprim stada ina contribuziun da 200’000 francs sin maisa. Il cussegl communal ha anc gì da decider en chaussa, aveva dentant surdà enavos la fatschenta a la suprastanza. Suenter pliras ponderaziuns e surtut perquai che la vischnanca ha gia concedì a las pendicularas da Mustér er ina contribuziun da 100’000 francs haja la suprastanza decis da proponer 100’000 francs sco sustegn. Quai sustegn è alura era vegni decis senza cuntravusch da las 36 persunas preschentas.
Plirs projects spetgan anc
La Andermatt-Sedrun Sport SA saja il mument vi da planisar plirs projects sin la vart tuatschina dal territori da skis. Uschia vegnia la sutgera a Val Val sco proxima renovada. La situaziun na saja dentant betg simpla cunquai ch’ils edifizis existents sa chattan en zona da privel e pon uschia betg vegnir simplamain renovads. Il mument sajan ins vida construir lavineras per far segir ils bajetgs, per ina summa da radund 4 milliuns francs, ha il president communal Martin Cavegn orientà ils preschents. Ma els sentian sco vischnanca che la Andermatt-Sedrun Sport veglia megliurar la situaziun sin intschess da Tujetsch e quai saja gea stada ina da las pretensiuns e giavischs da las convischinas ed ils convischins.
Approvà duas revisiuns da leschas
Era gì da tractar ha il suveran tuatschin la lescha davart il diever da las vias agriculas e forestalas. Qua ha quai dà sulet pitschnas midadas da formulaziuns ma la finala è la lescha vegnida approvada unanimamain. Era sustegn da tuttas persunas preschentas ha la revisiun da la lescha dal regulativ per l’economisaziun dals ruments chattà. Quai saja impurtant, perquai ch’ils davos onns na sajan ins betg pli da vegnir da cuvrir ils custs cun las entradas, ha il cusseglier communal responsabel Guido Monn infurmà ils preschents.
