Durant quels passa 20 onns è il Café Tschut stà in lieu da cuminanza. Quai bainbaud la damaun tar in café ubain da mezdi a gentar per ils mastergnants. Ed il café è er stà impurtant per las uniuns dal vitg e per il tschaiver. L’ustiera Beni e sia sora, Tina Derungs, han fatg or da quest café in segund dachasa per bleras e blers.
Sch’ins aveva ina giada ina bella festa ina saira, pudevan ins esser segir che la Beni guardava era ch’ins vegnia bain a chasa.
Uschia è il davos di ch’ellas han avert lur teca era stà plain emoziuns e memorias per las ustieras e la clientella. La Beni vegnia a mancar, di la glieud unisono bavend ses café. I saja stà strentg, per part fitg strentg, ma ella haja gì bleras uras bellas e legras, uschia l'ustiera dal Café Tschut. Ella faschess anc ina giada quai uschia.
Jau hai gì plaschair da far quai. Nus avain gì bleras bellas uras.
Tge che vegnia suenter na sappia ella anc betg, ma ella veglia ir a viagiar e prender peda. Ella veglia far da quai ch’ella n'ha anc betg gì il temps da far enfin ussa, manegia Beni.
Sin in davos café en il Tschut
-
Bild 1 von 5. Trun di grazia a l'ustiera dal café Tschut. Bildquelle: RTR.
-
Bild 2 von 5. La Beni va cun in surrir ed in larmin en pensiun. Bildquelle: RTR.
-
Bild 3 von 5. Glieud da pliras generaziuns vid la maisa radunda. Bildquelle: RTR.
-
Bild 4 von 5. Ils sumbrivals pudessan raquintar in pèr istorgias da festa ch'il Tschut ha vesì en quels onns. Bildquelle: RTR.
-
Bild 5 von 5. Bleras visitadras e visitaders han purtà fluras per las ustieras. Bildquelle: RTR.
La Beni va en pensiun ed ils e las da Trun han festivà l’ustiera enfin viaden en la notg. E bain che las soras na mainan betg pli l’ustaria datti ina buna nova: il local na vegn betg a svanir dal tuttafatg. Insatgi vegn a surprender l’ustaria a partir dal matg. Co exact che la successiun vegn a vesair ora, n’è dentant anc betg enconuschent.