Quai munta che l'ustiera Jolanda Cabalzar e l'ustier Reto Schildknecht han da cuschinar e preparar las spaisas per lur osps. Insumma marschi en ustaria l'avantmezdi. Il giasts regulars vegnan per in sitg, turistas e turists fan ina pausa durant lur viadi a pe u cun velo en la Ruinaulta.
Pervia da quai è RTR stà il mardi enfin mezdi en l'Ustria Mundaun, per guardar tge che schabegia en cuschina ed en ustaria enfin ch'i dat gentar. Betg mo la maisa da mezdi per las senioras ed il seniors ha fatg quest eveniment spezial. Mabain era da savair che Jolanda Cabalzar e Reto Schildknecht che mainan l'ustaria dapi passa 20 onns, chalan quest atun cun lur manaschi.
Ina èra va a fin
I saja stà in bel temp, quels pli che 20 onns, manegia l'ustiera Jolanda Cabalzar, ma i saja uss era stupent d'ir en pensiun l'october che vegn.
Nus avain emprendì d'enconuscher ils indigens ed era fitg blera glieud da la Bassa. Quai èn stads bels temps.
Jolanda Cabalzar na sa regorda betg vi da muments che n'eran betg bels. Ins sappia ch'ins haja da lavurar sco ustiera bleras uras, ed haja uschia pli pauc temp liber. Sco ustiera ed ustier sajan ins lià.
La chasa cun l'ustaria ha l'investider Theo Schaub cumprà – per renovar l'object e tant pli spert puspè avrir l'ustaria. Suenter ina davosa giada la stagiun culinarica da chatscha, van ils dus ustiers actuals en pensiun. Reto Schildknecht e Jolanda Cabalzar sa legran ch'els pon lura far chaussas ch'els na pudevan enfin ussa betg far, sco per exempel ir pli lunsch en vacanzas ni ir a concerts.
En cuschina cun Jolanda Cabalzar
Curt avant las 11 ha RTR visità la cuschiniera ch'è vi da preparar il gentar cun sia gidantra Dafina. Ellas duas preparan circa 20 tagliers Stroganoff da portg cun ris e spinat. Emprendì da cuschinar ha Jolanda Cabalzar da la mamma e da la tatta. E sco mattatscha è ella stada en l'hotel Casutt a Glion, tar il cuschinier Tini Casutt. In'ulteriura raschun impurtanta menziunescha Jolanda Cabalzar.
E perquai ch'jau fetsch gugent quai.
Maluns e las duas sorts capuns èn las spisas che vegnan il pli savens or da la cuschina da l'ustaria a Castrisch. Spisas simplas sajan quai che lur clientella giavischa. Savens cuschinan Jolanda Cabalzar e sia gidantra sulettas. Sche bleras empustaziuns arrivan, lu po la cuschiniera sa fidar da l'agid da sias soras, ina vischina u ina collega – e magari sias duas figliolas.
En ustaria cun Reto Schildknecht e ses osps
A la maisa da tschep sesan ils osps regulars dal Mundaun, ed era l'ustier Reto Schildknecht. In bun ustier saja in che prendia il temp per ils osps e respectia lur giavischs, manegia Schildknecht. Ed i saja adina da mantegnair la maniera envers ils osps. E sin la dumonda da RTR tge che vegnia a mancar il pli fitg cun chalar, ha l'ustier ditg:
Mes osps – quai è atgnamain stà il pli impurtant.
In dals osps che vegnan mintga di en l'Ustria Mundaun è Fredy Riedi. Sias visitas regularas saja ina tradiziun. Ed en ustaria sajan vers saira ils lavurers ed ils giuvens, lura savens chatschaders e tiradurs. E quai dettia discussiuns nunditgas. Quels discurs en cumpagnia avant ch'ir a tschaina, quai è il bel tenor Fredy Riedi.
Uss che l'ustaria vegn a serrar, quai vegnia a l'entschatta a mancar. Era l'ustier. E sche l'ustaria vegnia puspè ina giada averta saja quai in ristg, manegia Fredy Riedi. I dependia tgi che surpiglia l'ustaria, dentant ....
In ustier sco il Reto na survegnin nus betg pli.
L'Ustria Mundaun ch'exista dapi circa 20 onns ha duas spartas, las maisas per magliar bun e l'ustaria per in e scadin. Tenor l'ustier Reto Schildknecht èsi stà bun che lur manaschi ha sco duas fatschas, d'ina vart la cuschina e davantiers el sco figura. Sco Schildknecht relata, vul il nov possessur cuntinuar cun l'ustaria, las chombras vegnan dentant a svanir. Enstagl sajan planisadas trais abitaziuns.
La maisa da mezdi per senioras e seniors
La sala da ustaria è plaina. L'uniun da dunnas organisescha ina giada per mais la maisa da mezdi per senioras e seniors. Quella è bain visitada. Cumenzà hai cun trais fin quatter persunas, ed uss sajan els 10 fin 15, di Johann Jenal che visita gia dapi onns la maisa da gentar.
Junior-veterans èn vegnids in pèr. E quai è prima.
Ils osps èn cuntents cun la cuschina. Als blers plascha ch'igl è sco a chasa. I dat bler da tschantschar. Els veglian lura era vegnir puspè la primavaira e guardar tge cuschina ch'il nov ustier porscha. Ils seniors e las senioras guardan plain fidanza en l'avegnir da l'ustaria. Speranza dettia puspè cuschina sco da chasa, tempels da gurmet haja avunda en il conturn, quai na dovria betg.
Enturn enturn avain nus avunda da quels gourmets – e qua avain nus ina spisa da mintgadi.
La speranza è ch'il nov ustier vesa ils giavischs dals seniors e da las senioras. Ed uschiglio schess la gruppa a l'ustier, tge ch'els hajan gugent – ha Gian Caveng ditg e survegnì sustegn dals preschents.
Ina reminiscenza dal 2016
Ina visita pli speziala ha l'Ustria Mundaun a Castrisch gì avant passa otg onns. Sin giavisch da Reto Schildknecht e Jolanda Cabalzar è lur manaschi cumparì en Google street view. Tut il filmar ha dentant duvrà in pau lavur avant, ed RTR ha da lezzas uras pudì accumpagnar l'acziun.
