A Trin hai dà ier suentermezdi in incendi da guaud. Quai scriva la Polizia chantunala. Ils bunamain 60 pumpiers da Trin, Flem e Glion hajan svelt gì sut controllà las flommas ch’hajan furià sin ina surfatscha da radund ina hectara – quai correspunda a la surfatscha da 1,5 plazzas da ballape. . Er sajan dus helicopters, purs sco lavurers da la vischnanca da Flem stads en acziun. Persunas na sajan betg vegnidas blessadas. Daco ch’igl ha brischà n'è anc betg enconuschent. Er davart il donn material na dettia anc naginas indicaziuns uffizialas.
Privel d'incendis da guaud considerabel
Pervi da la sitgira vala en la regiun actualmain in privel d'incendis da guaud considerabel. En las valladas dal sid vala en pli in scumond absolut da far fieu en il liber.
