Ils egls da Leo Jeker glischan cura ch'el raquinta da la naiv tecnica. Avant 44 onns, il december 1978, han las pendicularas da Savognin producì per l'emprima giada naiv cun chanuns. Da quellas uras era quai il pli grond indriz d'ennavar en l'Europa.
Mancanza da naiv haja intimà el da chattar soluziuns. Ina fiss stada ina pendiculara gronda per transportar ils skiunz e las skiunzas en in'autezza cun segirtad da naiv, in'autra apunta la producziun da naiv tecnica.
La naiv producida a l'entschatta saja stada tut in'autra che ussa – ma cun l'experientscha al lieu saja er la naiv vegnida meglra. Il factur carstgaun saja dentant er ussa cun chanuns computerisads da gronda impurtanza. E per garantir bunas cundiziuns da pista saja sper il producir naiv er impurtant che la naiv vegnia scumpartida ed elavurada bain.
60 onns pendicularas Savognin
Leo Jeker ha furmà las pendicularas da Savognin. Da l'entschatta davent il 1962 enfin ussa è el stà en ina furma ni l'autra collià cun las pendicularas. Ussa è el sa retratg er dal cussegl d'administraziun e po guardar enavos sin in'istorgia da success. Sia pli gronda prestaziun - ni quella che resta en memoria, saja natiralmain stà la naiv tecnica. Ma schon da l'entschatta davent saja er il turissem da stad stà a cor ad el e las pendicularas da Savognin hajan gì avert er ils mais chauds.