L’onn 2018 ha la Gruppa da teater Mustér pudì festivar il giubileum da 30 onns. Che la producziun da l’onn 2018 saja l’ultima per ils proxims sis onns, n’avess nagin pensà da lez temp. Pertge il 2019 è vegnì mussà il toc «La stria da Dentervals» or en il liber a Sontga Gada, ed il 2020 è la Gruppa da teater vegnida franada il mars gist avant la premiera tras la pandemia. Alura han ins anc empruvà da stuschar il toc sin in termin pli tard e la finala han ins rut giu l’experiment, declera il reschissur Sigis Beer. E suenter èn ils onns quasi sgulads sperasvi, ed uss quatter onns pli tard po la gruppa manar si il toc «Ina notg fatala».
L’emprim pli grev da chattar la motivaziun
Suenter l’emprova generala il 2020 hai gì num da far ina pausa sfurzada. Alura han ins empruvà da stuschar la producziun, ma la finala èsi stà nunpussaivel. Il 2023 han ins alura cumenzà memia tard cun las emprovas per pudair mussar il toc e perquai vegn quel pir uss, declera Sigis Beer. La motivaziun per far teater era dentant gronda, era sche quai ha duvrà l’entschatta dapli engaschi. Era n’è il toc betg il medem sco il 2020, damai ch'ins ha stuì remplazzar quatter acturas ed acturs e puspè cumenzar quasi tar nulla l’atun passà. Ma la finala possia la Gruppa da teater sa basar sin pliras acturas e plirs acturs fidaivels che giogan quasi mintg’onn teater – ed era sin la giuventetgna che vegnia per part or da la gruppa da teater d’uffants.
Ina cumedia era per rir
Il toc «Ina notg fatala» è vegnì scrit dad Armin Vollenweider e translatà en rumantsch da Thomas Beer. La cumedia cumenza suenter ina lunga notg da festa per il president communal e ses collega, cun sa regurdar tge ch’è propi capità la notg passada. Plaun a plaun vegn tut a la glisch, las pajas da las emploiadas e dals emploiads èn svanidas e la polizia e la pressa vul savair exact co tut è capità. Il president e ses collega emprovan sinaquai da schliar ils embrugls – e da declerar tant a la chanzlista communala sco era a la dunna la situaziun suenter ina tala notg fatala.
Premiera en 10 dis
Las producziuns en halla Cons a Mustér cumenzan cun la premiera ils 19 da schaner. Alura suondan anc quatter represchentaziuns da la Gruppa da teater Mustér.
