En il decurs da l'atun passà han las vischnancas da Breil, Mustér, Medel, Sumvitg, Trun e Tujetsch decis da fundar la Corporaziun da las vischnancas concessiunarias da l’Ovra Electrica Rain Anteriur SA (COORA). Medemamain han ellas acceptà ils statuts da quella.
Emprima radunanza
Gievgia passada, ils 30 da schaner 2025, ha la COORA salvà si’emprima radunanza da delegadas e delegads a Trun. A quella han las representanzas da las sis vischnancas eligì Patrick Schaniel, il president communal da Sumvitg, sco president da la corporaziun. Walter Deplazes da Surrein è vegnì tschernì sco vicepresident.
Sco commembers da l’emprima suprastanza èn medemamain vegnids eligids il president communal da Tujetsch Martin Cavegn, il mainafatschenta da l’Energia alpina a Tujetsch Ciril Deplazes ed il president communal da Trun Dumeni Tomaschett. Sco quai che la COORA scriva en ina communicaziun als meds da massa, ha la radunanza da delegadas e delegads approvà il preventiv per l'onn 2025, sco era reglaments davart l’organisaziun ed il manaschi da la corporaziun.
Fasa vegnenta impurtanta
Ils proxims onns han las sis vischnancas sisum la Surselva da sa fatschentar cun la concessiun nova per il niz da l’aua. L'onn 1955 avevan ellas decidì da collavurar cun il chantun e la NOK (Ovras da la Svizra dal nordost, oz Axpo) davart l’utilisaziun da la forza idraulica dal Rain Anteriur e da ses flums laterals. «Las entradas en furma da tschains d’aua, da la vendita da l’energia da concessiun e da participaziun sco era las dividendas èn entradas d’immens gronda muntada per nossas vischnancas», scriva la COORA en sia communicaziun als meds da massa e constatescha plinavant: «Ussa entschaiva in’ulteriura fasa fitg impurtanta per las vischnancas. Igl è da decider, co cuntinuar cun la concessiun per il dretg d’utilisar las auas che scada l'onn 2048.»
Cun forzas unidas da sis vischnancas
Las sis vischnancas concessiunarias èn da l'avis che las dumondas che sa dattan il proxim temp pon vegnir respundidas il meglier communablamain. Quei pertutga per exempel il return a tschep e las contractivas davart la cunvegnientscha per la valur restanta da l’Ovra Electrica Reinanteriur SA. Mo era dumondas pertutgant la participaziun a quella.