Marino Capelli, ch’ha triumfà per l’emprima giada al maraton da la Surselva, ha battì en il sprint final a Marius Danuser, oriund da Vättis. Quel era gia stà tar il davos maraton il 2020 sin il podest, numnadamain sco terz. Quest onn cumplettescha sco terz il podest, cun in retard da bunamain duas minutas, l’Engiadinais Curdin Räz.
Dapli infurmaziuns
Tar las dunnas ha Seraina Boner gudagnà gia per la quarta giada il Surselva Maraton. Uschia ha ella gudagnà uschè bleras giadas sco ses um, Toni Livers. Quel ha stuì desister d’ina partenza ord motivs da sanadad. Boner ha gudagnà a moda suverana cun in avantatg da passa duas minutas sin la Taliana Laura Colombo. Terza è vegnida Maria Christen da Hospental.
Impressiuns da la cursa 2022
-
Bild 1 von 10. Marino Capelli a la testa e sin ses chaltgogns Marius Danuser. Bildquelle: Stefan Schwenke.
-
Bild 2 von 10. Seraina Boner ha dominà la cursa tar las dunnas. Bildquelle: Stefan Schwenke.
-
Bild 3 von 10. da san. Pirmin Pfister, Remigi Maissen e Marco Petschen dal Club da skis Trun. Bildquelle: Andreas Wieland.
-
Bild 4 von 10. Ina da duas rundas èn dumagnadas. Bildquelle: Andreas Wieland.
-
Bild 5 von 10. La tensiun crescha – paucas secundas avant il tun da partenza. Bildquelle: Andreas Wieland.
-
Bild 6 von 10. Be mo la furma, er il material sto constar per cuntanscher in bun resultat. Bildquelle: Andreas Wieland.
-
Bild 7 von 10. Mintgin cumbatta per in bun plaz da partenza, uschia èsi da star da stretg. Bildquelle: Andreas Wieland.
-
Bild 8 von 10. I vegn sa gidà in cun l'auter, er da trair en il numer da partenza. Bildquelle: Andreas Wieland.
-
Bild 9 von 10. Il speaker Roger Alig en il discurs cun il participant brasilian Steve Hiestand. Bildquelle: Andreas Wieland.
-
Bild 10 von 10. Ils participants dal maraton da la Surselva èn currids duas rundas sin la loipa tujetschina. Bildquelle: Andreas Wieland.
La cursa curta sur 12,5 kilometers, pia ina da duas rundas sin la loipa tujetschina, han gudagnà tar las dunnas Monika Bearth da Sedrun e tar ils umens Elia Sossai da Trun.
President dal maraton sa mussa cuntent
Tut en tut èn stads a la partenza bunamain 200 curridras e curriders – in zic pli pauc ch’ils onns avant. Pervia da la pandemia da corona era il maraton vegnì annullà l’onn passà. Il comité d’organisaziun cun lur president Guido Friberg è cuntent ch’igl ha puspè dà quest onn ina cursa, quai cun tegnair en diversas perscripziuns da corona.
Ch’il dumber da participants sa sminueschia, haja era da far cun il fatg ch’adina pli paucs curriders indigens e populars desistan sin far cursas. Tuttina saja la finamira er da manar atras il Surselva Maraton il 2023, uschia Friberg.