Sgular cun aviuns istorics na saja insumma betg pli privlus che sgular cun models moderns, di Carlo Ronchetti che sgola sez l’Antonow e ch’è era pilot instructur.
Quests aviuns istorics èn exact uschè segirs sco aviuns novs.
Mintga aviun dovri mantegniment e tgira. L’Antonow AN-2 vegn era numnada tractor da l’aria. Ella è in aviun a duas alas, ha in grond motor e vala sco robust. Dapi 1947 datti Antonows, quella da Bogn Ragaz è da l’onn 1990, dentant sa basa ella sin il model original cun pauc ni nagina electronica.
Igl è perscrit exact, tge toc da l’aviun che sto vegnir midà ora suenter in tschert temp, e quai vegn controllà regularmain dal manaschi da mantegniment e da l’Uffizi federal d’aviatica civila.
Antonow sco bus da scola
Che aviuns istorics na sajan betg pli privlus ch'aviuns moderns demussia era il fatg che Antonows vegnian anc duvradas ozendi regularmain, per exempel en la Sibiria. Là vegnan ils uffants sgulads cun las maschinas legendaras a scola.
Da las 18’000 Antonows ch’èn vegnidas producidas enfin l’onn 1992 vegnian anc plirs milli aviuns sguladas sin l’entir mund.
RR actualitad 17:00