- Al Piz Segnas sur Flem è crudà giu in aviun dal tip Junkers JU-52 numnà «Tante Ju». 20 persunas perdan lur vita.
- A bord eran 11 umens e 9 dunnas tranter 42 ed 84 onns. Nagin n'ha survivì la disgrazia. 17 unfrendas èn da la Svizra e 3 da l'Austria.
- La raschun per la crudada n’è anc betg clera.
- L'interpresa JU-Air ha communitgà ch'il traffic aviatic saja suspendì ad interim.
L’aviun era sin il sgol da return davent da Locarno a Dübendorf. Sco la gestiunaria dal aviun JU-Air ha communitgà. L'aviun saja crudà cun gronda spertadad sin terra. Ins po excluder ina collisiun u ina influenza da dador. Ils dus pilots da l'aviun hajan gì grond'experientscha da sgular cun l’aviun dal tip JU-52. Tuttas persunas a bord èn mortas, ellas èn oriundas dals chantuns Turitg, Turgovia, Lucerna, Sviz, Zug e Vad sco era in pèr cun lur figl da l'Austria.
La gestiunaria JU-AIR ha suspendì tut il traffic aviatic da l’interpresa ad interim. La raschun per la crudada n’è anc betg clera. Las lavurs da scleriment vegnan a cuzzar pliras emnas. Igl è il pli grev accident da l’aviatica svizra dapi l’onn 2001.
-
Bild 1 von 9Legenda: Nagin ha survivì la disgrazia. 17 unfrendas èn da la Svizra e 3 da l'Austria. SRF -
Bild 2 von 9Legenda: Davosa fotografia da l'aviun «Tante Ju». Kari Aebi/SRF
-
Bild 3 von 9Legenda: Polizia chantunala ha infurmà en ina conferenza da medias. RTR, Linus Livers
-
Bild 4 von 9Legenda: Conferenza da medias gestiunaria dal aviun JU-Air: infurmaziuns davart il pilot. RTR, Linus Livers
-
Bild 5 von 9Legenda: Medias èn preschentas a Flem. RTR, Linus Livers
-
Bild 6 von 9Legenda: I vegn sgulà rauba en il lieu da la crudada da l'aviun. RTR, Linus Livers
-
Bild 7 von 9Legenda: Aviuns a Flem: Blers helicopters èn pronts da gidar. RTR, Linus Livers
-
Bild 8 von 9Legenda: Plirs helicopters èn pronts da gidar. MAD
-
Bild 9 von 9Legenda: Accident d'aviun al Piz Segnas. Keystone
La polizia ha installà ina hotline per confamigliars 081 256 56 56.
Ju-Air tgi è quai?
La Ju-Air è in'uniun dals amis da l'aviatica militara cun radund 4'000 commembers. Cun ils aviuns dal tip JU-52 vegnan fatgs sgols panoramics. L'uniun ha sia basa sin la plazza aviatica militara da Dübendorf.
L'aviun ha plaz per fin a 17 persunas e durant ils mais da stad vegnan la sonda regularmain purschidas sgols panoramics sur la Surselva e la Val Lumnezia. Quai scriva SRF. L'Uffizi federal da traffic aviatic ha ordinà per il territori in scumond da sgular.
RR novitads 20:00++