Gia per la terza giada ha la vischnanca da Glion surdà il «Premi Reuniun». In premi che duai undrar las uniuns per lur engaschi voluntari per la convivenza e la communitad. Mintga dus onns vegn il premi surdà durant il «Städtlifest». Quest onn va il premi principal, dotà cun 2’000 francs, a l’uniun «a Glion». Sco il president communal Marcus Beer ha ditg en ses pled festiv, sa tractia d'ina uniun giuvna ch’haja ils ultims onns muventà bler en vischnanca. Uschia ha ella promovì l’activaziun da la «Via Glion» e lantschà la cursa populara «Städtlilauf». Era promova ella fitg la realisaziun d’in pumptrack a Fontanivas. Per l’uniun che dumbrà il mument var 25 commembras e commembers – ina gonda onur, ha il vicepresident Gian Marco Bianchi ditg. Els veglian sustegnair ideas innovativas che portian vinavant la vischnanca e che fetschian ella pli attractiva.
Dus premis da renconuschientscha
En tut eran tschintg uniuns en la schelta stretga. La finala n’han betg tuts survegnì in premi, era sch’els hajan fatg buna lavur, ha declerà Marcus Beer, il president communal. Perquai ha la vischnanca anc surdà dus premis da renconuschientscha, mintgamai dotà cun 500 francs. In da quels va a la «Fundaziun Ruina Frundsberg» da Ruschein. Ina fundaziun ch’ha cun bler engaschi e lavur cumina renovà e fatg accessibla la ruina dal casti da Frundsberg a Ruschein. Il segund premi va a l’uniun «Strickgruppe Pfrundhaus». L’uniun pitschna s’inscuntra regularmain en il «Pfrundhaus» a Glion per far da cuminanza chaltschiel. Las lavurs manualas vegnan alura vendidas e las entradas surdadas ad instituziuns ed uniuns caritativas. Uschia ha ella pudì surdar l’ultim onn radund 40’000 francs en favur da differentas uniuns caritativas.
