L’annunzia da la mesemna passada che l'hotel La Siala a Falera serria definitivamain las portas la fin mars 2025 è stada in pau ina surpraisa. I dettia dentant plirs motivs ch'hajan impedì da realisar l’idea d’antruras da segirar a Falera il sulet hotel en vischnanca. Per l'ina hajan ils possessurs da las abitaziuns colliadas cun La Siala occupà ils abitadis durant la stagiun auta. Il sistem da l'hotel na funcziunava pia betg pli. Plinavant saja la situaziun da persunal ina sfida per il concept da La Siala. La finamira dals possessurs da mantegnair l'hotel e da scriver almain ina «nulla naira» n'è betg gartegiada.
Hotel en bun stan
Avant in pèr onns han ils possessurs da l’hotel renovà il bajetg per 2,6 milliuns francs. El è pia en in bun stan. E sper las 13 chombras d'hotel hai anc 30 abitaziuns administradas en la surbajegiada. Cler èsi ch'i sto dar schliaziuns per pudair porscher pussaivladads da pernottaziun en il vitg turistic da Falera, per il temp suenter ch’il vitg ha pers sias davosas chombras d’hotel. Pervia da quai hajan ins stuì agir immediat, uschia il president communal da Falera Norbert Good. Quai saja capità sin iniziativa privata e betg communala. Ins veglia che las var 30 abitaziuns administradas restian sin il martgà. I dettia uschia schliaziuns a curta vista ed il president communal spera ch’ins vegnia da finalisar quest pass.
Uschia pudessan las abitaziuns vegnir scrittas ora sin la plattafurma d’ina interpresa ch’è in'actura principala sin la fiera europeica da laschar vi chasas ed abitaziuns da vacanzas. Las chombras d’hotel sco er l’entira infrastructura da quel vegnan dentant serradas cun la fin da mars.
Il resort La Mutta duai porscher alloschaments en l’avegnir
Cunquai che l’hotel La Siala serra sias portas, daventa il project La Mutta anc pli impurtant. La vischnanca e l'interpresa Arena Alva vulan sviluppar ensemen cun la Blauhut SA in resort turistic a l’entschatta dal vitg. Quest resort na fiss alura betg lunsch davent da l'hotel La Siala. Il mument stoppian ins dentant anc spetgar sin ina decisiun da la Dretgira administrativa dal Grischun, cunquai ch’i ha dà ina protesta en connex cun il project.
Nus avain il project La Mutta, quel datti dapi daditg ed anc adina. E suenter la fin da La Siala tant pli.
Per planisar il resort La Mutta fissi en l’avegnir dentant impurtant da savair co i va vinavant cun l’infrastructura da l'hotel La Siala, uschia Norbert Good. Ils dus bajetgs dependan in da l’auter. Sch’ins na possia per exempel betg pli duvrar la part da wellness da l’hotel, stoppian ins chattar autras schliaziuns. Ina pussaivladad fiss d'integrar quel en il resort La Mutta.
La vischnanca da Falera vul tenor la strategia da l’organisaziun da turissem Flem Laax Falera metter accents sco lieu da cultura, da recreaziun ed era sco destinaziun per famiglias. Cun il parc preistoric La Mutta, l’observatori astronomic Mirasteilas ed il center da cultura La Fermata, ha Falera bunas premissas per quai. Ma pertutgant l'alloschament dals osps spetgan anc ina u duas sfidas la vischnanca turistica.
Adattà al tema
Arno Sgier vegn ad esser il davos hotelier da l'hotel «La Siala» a Falera. En l'emissiun «Profil» ha el discurrì davart sia vita e sia lavur en l'hotelleria.