Balzer Spescha sa regorda anc bain co els han chattà il cuvel. Ina giada en tauna hajan ils dus buobs vis ina sfendaglia en la part davostiers. Cun bittar crappa en quella, vesan els giun plaun ina chavazza d’in carstgaun. Els cloman natiers creschids. En l'emprim mument procura quella scuverta per bleras dumondas, surtut sche la chavazza è d’ina persuna sparida. La grondezza da la chavazza inditgescha ch’ella appartegn pli probablamain ad in uffant. Suenter che la Polizia chantunala vegn sin il plaz examinescha il medi da Trun la chavazza. Lez vegn a la conclusiun che la chavazza è pli veglia. Uschia intercurescha il Servetsch archeologic la tauna e chatta pauc u nagut: auter che la chavazza in pèr oss d’in cunigl. Il corp da la chavazza n’è betg denturn. L'archeolog scriva in rapport, la chavazza vegn inventarisada e svanescha suenter en il deposit dal servetsch.
-
Bild 1 von 5Legenda: Balzer Spescha davant l’entrada da la tauna. RTR, Daniel Berther -
Bild 2 von 5Legenda: In cuc da tauna en. RTR, Daniel Berther
-
Bild 3 von 5Legenda: Dissegn da la tauna da l’archeolog ch’è sta sin il plaz. Servetsch archeologic Grischun
-
Bild 4 von 5Legenda: Chavazza da vart dretga... RTR, Franco Caviezel
-
Bild 5 von 5Legenda: ... e da tschella vart. RTR, Franco Caviezel
Tranter il 2017 ed il 2020 digitalisescha il Servetsch archeologic ses inventari e cartografescha ils lieus da chat. El prenda uschia puspè nauadora la chavazza da Dardin. E quella fatschenta l'archeolog Raphael Sele.
Nus avain gì plirs lieus da chat sumegliants or dal temp da bronz en ils davos onns. Pia skelets ch’èn vegnids chattads en taunas.
Cunquai ch’il Servetsch archeologic haja scuvert fossas dal temp da bronz tempriv en taunas vegn la chavazza intercurida d’ina antropologa da l’Universitad da Basilea. Ultra da quai vegn l'oss intercurì dal Politecnicum a Turitg cun la metoda da carbon. Quai per savair datar l'object. Ils resultats èn ina pitschna sensaziun: La chavazza è passa 3’500 onns veglia. Tenor ils archeologs appartegneva ella ad ina dunna ch’è morta en la vegliadetgna da 30 enfin 50 onns. Pli probablamain saja la tauna stada il lieu da sepultura da la dunna.
Che la regiun enturn Dardin saja stada abitada en il temp da bronz n’è betg attestà tenor il Servetsch archeologic. Chats da culegnas en la regiun hajan ins fin ussa fatg a Trun (Grepault), Ruschein (Pleun da Buora), Falera (Muota) e Lumbrein (Crestaulta). La chavazza è il mument enavos en il deposit dal Servetsch archeologic. La pli veglia abitanta da Dardin vegn a salvar blers misteris per ella.