Capanegals e projectils da plum
Sin la costa sur il Crap Ses èn voluntaris e studentas e students da l'Universitad da Basilea fatschentads cun detecturs da metal e badigls. En in territori da prest tschintg plazzas da ballape chattan els adina puspè capanegals (guttas da chalzers) da sandalas romanas. Era 200 projectils da plum han els chattà. Quels projectils sajettavan ils schuldads romans cun schlingias. Questa stad han els er chattà restanzas da l'equipament dals cumbattants indigens. Quai è la segunda tschertga sistematica d'artefacts.
![Ils experts al lieu d'excavaziun Ils experts al lieu d'excavaziun](https://www.rtr.ch/static/cms/images/960w/74be49.jpg)
Emprim champ da battaglia roman
Grazia a quellas scuvertas e tenor emprimas retschertgas crajan ils archeologs ch'igl haja dà en la chavorgia Crap Ses in cumbat tranter legiuns romanas è truppas reticas. Quai en il rom da la campagna militara tras las Alps ch'è vegnida lantschada l’onn 15 a.C. Sche quella supposiziun vegn en il decurs dal project confermada, lura fiss quai l’emprim champ da battaglia roman sin territori svizzer.
![Ina da las scuvertas dals cumbattants indigens Ina da las scuvertas dals cumbattants indigens](https://www.rtr.ch/static/cms/images/960w/daa2cd.jpg)