Enfin ussa sajan be tocca singula da quest temp vegnida scuvrida, di il manader da l'exchavaziun Raphael Sele. Els hajan dentant sminà ch'i dettia anc dapli. Ed ussa han els scuvrì tranter auter otg fossas d'avant passa 1'500 onns. Intgins da quels skelets èn anc entirs, ils blers dentant donnegiads perquai ch'ins ha cultivà quai funs sur onns. Il spezial dentant: Intginas baras n'èn betg vegnidas sutterradas entiras, dentant vegnidas brischadas. Quai saja ina raritad per il chantun:
En la Val dal Rain u en autras regiuns da la Svizra han ins gia scuvrì da quellas baras. Ma en il Grischun è quai insatge nov.
En las fossas han ils archeologs e las archeologas era anc chattà differents objects ch'ils perdavants han sutterrà cun las baras. Per exempel oss d'animals, tipica cheramica fina dals Romans, objects da vaider, cuntels da fier u ina fibla ch'ins duvrava per serrar il vestgì.
-
Bild 1 von 4Legenda: Duas da las var otg persunas che lavuran sin il plaz. RTR, Carmen Monn -
Bild 2 von 4Legenda: Raphael Sele (davos) e Christoph Walser decleran las scuvertas ch'il Servetsch archeologic dal chantun ha fatg. RTR, Carmen Monn
-
Bild 3 von 4Legenda: Intginas da las scuvertas èn tocca da crappa. RTR, Carmen Monn
-
Bild 4 von 4Legenda: Las archeologas ed ils archeologs han era chattà ina cria da crap ed ina fibla ch'ins duvrava per serrar il vestgì. RTR, Carmen Monn
Medemamain han els era chattà restanzas dal lieu da viver. Quellas restanzas da mirs, chasas e fuainas dettian in meglier maletg dal vitg da Zezras d'antruras. Bleras scuvertas sco per exempel ils skelets vegnan messas en salv en il deposit dal Servetsch archeologic dal Grischun uschia ch'ins po anc intercurir ellas pli exact.
Enstagl d'exchavaziuns ina surbajegiada
Il pli tard en 1 onn dentant, vegnan ins a vesair pac ni nagut da quellas exchavaziuns pli. Sin il plaz nua ch'i vegn anc fin la fin 2022 scuvert ed intercurì, sa chatta numnadamain bainbaud ina garascha sutterana e plirs blocs d'abitaziuns.