L'emprima giada vegn il Bogn Tenigia numnà en in document dal 1580. Radund 100 onns pli tard cumpra il «Landrechter» Nikolaus Maissen il bogn e bajegia l'emprima chasa da bogn sco er la chaplutta «Nossadunna da la naiv». Adina puspè mida il bogn possessurs, il 1886 cumpra Stanislaus Caplazi da Rabius il bogn e bajegia ina «dépendence». L'onn 1909 nascha la Waldhäuser SA cun il nov bajetg da hotel en il «Jugendstil». Il turissem da cura flurescha.
En ses meglier temp è il Bogn Tenigia stà in resort da luxus per far curas d'aua minerala. Cun l'aua da la Val Sumvitg possian ins curar mals e catars da tuttas sorts, stat scrit en vegls prospects. Ils onns enturn il 1900 ha il directur Stanislaus Caplazi carmalà numerus osps, cunzunt da la Germania, en la Val Sumvitg. Cun la Segunda Guerra mundiala han ils osps dentant entschet a mancar. Er ils collavuraturs da l'hotel han sentì la guerra.
La guerra ha lura er muntà la fin da l'hotel. Il 1951 ha el serrà sias portas ed è daventà proprietad da la Banca Chantunala Grischuna. Lezza ha anc insaquants onns dà a tschains l'hotel a duas soras Ferroni. Ellas han purschì champs da vacanzas per uffants en l'hotel. Dentant, il luxus aveva bandunà la val.
L'onn 1970 aveva la famiglia Schulz cumprà il bogn Tenigia e bajegià in nov hotel. Mo paucs onns pli tard ha quel lura puspè serrà. L'hotel era passa 50 onns en il possess da la famiglia. L'onn 2023 ha lura Rolf Diefenbacher, in impressari dal chantun Turitg, cumprà l'areal da 6 hectaras cun tut ils stabiliments, las funtaunas ed il guaud che tutgan latiers. El vul dar nova vita a l'hotel che n'è dapi 46 onns betg pli en funcziun. Però, in bogn da cura na vegnia betg pli a dar.