Ozendi na datti betg pli la displasia da la batschida. Cun in maletg da sonografia en las emprimas emnas e cun far sitg als uffants durant l'emprim onn da vita po l'impediment corporal vegnir curà simpel. Avant prest 70 onns na saveva la medischina anc betg tge far cun ils uffants pertutgads.
Moviment è il pli impurtant
Rita Cadruvi n’ha mai sa laschà impedir da ses impediment corporal. Moviment e viandadas extendidas tutgan anc oz tar il mintgadi da la dunna pensiunada. Ina giada l’emna fa ella viandadas d'enturn trais uras.
Pli taiss e pli gugent che jau hai. Mo planiv è nagut. Ils musculs ston vegnir en moviment
Las pli grondas turas che Rita Cadruvi ha fatg èn stadas quellas sin la Greina. La davosa giada avant sis onns. Ina giada ad onn va ella u sin il Piz Mundaun u sin il Lai da Laus.
Adina da viadi cun crutscha
La crutscha è daventada indispensabla ils davos varga 25 onns. Rita Cadruvi ha dentant ina crutscha speziala, in unicat or da lain.
Quella ha in scrinari construì per mai or da lain da glienda/tigl e nuscher. Ella è fitg leva. Jau hai gì il nas plain da quellas crutschas da plastic
Rita Cadruvi prenda adina cun ella sia crutscha. Quella dat ad ella segirtad e gida da restar movibla.
