Aventura a Tavau - Nov pedalo per sutgas cun rodas a Tavau

Runja e Malina fan in'experientscha tut speziala. Las soras ch’èn liadas vid la sutga da rodas pon ir cun pedalo. Fin uss n’era quai betg pussaivel per ellas. Il bab surmunta la rampa che maina da la via sin il quai. Alura vai anc sur ina segunda rampa, la nav fa in pau ballabaina. Quai saja nunusità di Runja, la sutga saja fitg stabila sin terren. In sistem da tschentas porscha stabilitad, ina vesta da nudar segirtad.

La famiglia accumpogna las giuvnas e manischescha la bartga. Els navigheschan vi e nà, tuts che rin e salidan. La Malina ha uschè grond plaschair ch’ella fa anc ina segunda tura. Runja era gia stada sin ina bartga da remblar, ma quella saja uschè bassa ch’ella n’haja betg vis bler. Sin il pedalo haja ella ina bellezza survista.

Ina excursiun cun pedalo e sutga da rodas

Sviluppà sez

Questa experientscha è pussibla entras l’organisaziun dal svilup regiunal «Access unlimited». In model specific da pedalo per sutga da rodas n’exista betg, di Johny Wenger da la scola da navigar a vela dal lai da Tavau. «Access unlimited» haja dumandà da far ina purschida senza barrieras. El haja adattà l’access al quai existent cun rampas ed il furnitur da la bartga haja agiuntà ina balustrada ed in sistem da fixar. Il quantum da lavur per adattar il pedalo, l'access sco er per porscher l'entira aventura è survesaivel.

Ils passagiers vegnan cun lur atgna sutga, il sistem da fixar è il medem sco en l’auto. Mo las sutgas electricas èn memia grevas, il mument na pon questas betg vegnir duvradas sin l'aua. Per el sa chapeschia da sasez ch’ins porscha era las pussaivladads a las persunas che na pon betg nizzegiar las purschidas regularas, il principal saja da far plaschair.

Runja haja bun access a blers lieus. Tge ch’ella giavischa è da cuntanscher pli lev l’aua per pudair nudar. Per la Malina cun sia sutga electrica na saja insumma betg bun. Là sajan gia ils pitschens stgalims nunpassabels.

Surmuntar barrieras dovra blera forza, cun purschidas senza barriera pon ils pertutgads giudair las vacanzas. Il svilup saja bun, di Claudia Althaus, mamma da Runja e Malina, dentant dettia anc bler potenzial. Impurtant saja ina vasta purschida, betg tuts fan gugent il medem ed era las restricziuns varieschan. Ella ha plaschair che sias figlias pon prender part activ a las vacanzas. Senza «accessibilitad senza barrieras» ston ils geniturs surmuntar ils obstachels cun forza, quai saja in «chrampf» che s’augmentia cura ch'ils uffants creschan.