Dapi quest'emna stat sin il grip, là nua ch’il Rain da Tujetsch s’unescha cun il Rain da Medel, ina tur da lain construida da l’ETH da Turitg. L’idea dal seminari dals architects e professurs Fabio Gramazio e Matthias Kohler è da construir cun lain objects cumplex e quai cun agid da roboters. La construcziun actuala ch’ha chattà plaz a Caschlatsch sa basa sin elements ch’han ina lunghezza da 70 sin 70 centimeters. L’iniziant Stefan M. Seydel numna quest element il «voxel» e la tur a Caschlatsch consista la finala da radund 350 da quels «voxels». Che questa tur ha la finala chattà la via a Mustér è il merit da Seydel. El ha cun ses contacts a l’ETH motivà ils responsabels da realisar il project sin il grip e betg da restar sco usità en il labor a Turitg.
Accessibla e svanaivla
La tur actuala è accessibla. Quasi sisum pon ins seser sin ina plattafurma e giudair la vista. La via che maina a la tur è dentant adattada be per persunas ch'èn bain a pe, e la vischnanca da Mustér fa sias ponderaziuns, co segirar il lieu. La finala saja l’entira construcziun sin in grip e surtut là vegnian ins a far ponderaziuns per segirar l’entira situaziun, uschia Roland Cajacob da l’uffizi communal da construcziun ed infrastructura. Il mument vala l’object sco art ed ha uschia nagin temp da scadenza. Il lain vegn simplamain a smarschir cun ils onns ed uschia saja era l’entira construcziun svanaivla, di l’architect Ursin Huonder. Impurtant saja che tut ils contacts ed era il spiert dal project restian. Uschia èsi planisà da cuntinuar cun las sairas d’inscunter mintgamai il venderdi saira. Quai saja daventà ina maisa radunda moderna cun referats e discussiuns e quai basegnia era vinavant, di Ursin Huonder. Ed il connex cun il seminari da l’ETH nua ch’il dialog da construcziun tranter uman e maschina stat en il center vegnia uschia transferì sin in'autra dimensiun, numnadamain il dialog tranter umans da differents geners, di Stefan M. Seydel. Equai saja bun da mantegnair.
Visita il mars a l'ETH
A Mustér vegn anc questa stad realisà in project da studentas e students d’architectura da l’ETH Turitg. La finamira dal seminari è da realisar or da lain cun agid da roboters ina construcziun cumplexa. Ina gruppa da persunas interessadas or da la Cadi ha fatg glindesdi passà viadi a Turitg per guardar las ideas da las studentas e dals students. Part da quella gruppa fa era Adrian Maissen, mainafatschenta da l’interpresa Bearth SA a Rabius che vegn a construir ina part dals elements en sia lainaria e scrinaria a Rabius. Ils quatter projects mussads èn tuts fitg interessants ed era futuristics e surtut il process da construcziun cun ils roboters è fitg fascinant, uschia ha ditg Adrian Maissen. El sa legria fitg dad esser cun ses collavuraturs part da quest project.
Process da decisiun communabel
Ina da las sfidas per l’ETH Turitg è da chattar lieus concrets per las lavurs da las studentas ed ils students. Che quai è uss Mustér è in dals merits da Stefan Seidel ch’enconuscha gia plirs onns il professur Fabio Gramazio. El ha discussiunà l’idea cun l’architect indigen Ursin Huonder ed or da quella discussiun è naschida l’idea da realisar in tal project a Caschlatsch. Ch’il project vegn uss pli e pli concret legra Ursin Huonder ch’ha sez studegià architectura a l’ETH Turitg.
Il process da decisiun n’è betg in process da surengiu mabain in act da discussiun. Quel vegn fatg per l’ina tranter las studentas ed ils students che vegnan a decider tuts ensemen tge project che vegn realisà, ma era tranter la populaziun indigena che po mintga venderdi esser part dal project en il biro da Ursin Huonder a Mustér. «Nus avain in spievel da 3D e cun quel pon ins propi visualisar ils projects ed era discurrer sur da variantas e la finala s’inscuntrar», accentuescha l’architect a Mustér. Sco proxim saja impurtant che las ideas vegnan era concretisadas. Per l'ina sin palpiri, u visual al computer, concret al lieu è ina da las grondas sfidas ed in process che dovra era ses temp, accentuescha Ursin Huonder.
Lubientscha per project d’art cun temp limità
La suprastanza da la vischnanca da Mustér ha lubì in project artistic cun in temp limità a Caschlatsch. Quai saja pussaivel da far en atgna cumpetenza, ha il president communal da Mustér René Epp accentuà durant sia visita a Turitg. Per el èsi fascinant da vesair las ideas da las studentas e dals students e la finala possia quest project era esser ina attracziun per las abitantas ed ils abitants da Mustér, ma era per tut las visitadras ed ils visitaders. La finamira è da realisar la construcziun la stad. In termin na datti anc betg, ma tge ch'è cler suenter la visita a l’ETH, è ch’il project vegn ad esser unic e futuristic.
