Sch'i va tenor las parlamentarias ed ils parlamentaris da la vischnanca da Glion duai la vischnanca spargnar 5% sur tut las partiziuns. 5% da tge exact, n’explitgescha l'incumbensa parlamentara da Claudio Quinter betg. Il president communal da Glion, Marcus Beer ha ditg envers RTR ch'el spetgia dal parlament che lez defineschia cleramain tge ch'el veglia.
5% da tge? Per mai n’èsi betg cler.
Sin dumonda al parlamentari ch'ha inoltrà l'incumbensa, di Claudio Quinter ch'ins duaja prender las expensas da l'onn avant sco basa da calculaziun ed alura subtrahar ils 5%.
In exempel: Sch’ins ha dà ora per material da biro 100’000 francs, alura dat ins l’onn proxim ora 95’000 francs. Uschè simpel è quai.
La medema incumbensa dumonda per l'autra che la vischnanca presentia in preventiv annual equilibrà, che l'atgna finanziaziun na duai betg esser sut 70 pertschient e che la cumissiun da finanzas survegnia rapports intermediars da la vischnanca. Auter ch'ils rapports intermediars ha il parlament approvà tut ils puncts. La suprastanza communala ha proponì da surdar parzialmain l’incumbensa da Claudio Quinter, dentant betg il punct da spargnar 5% sur tut ils posts da servetsch. Il parlament ha dentant era approvà quel cun 18 encunter 5 vuschs.
Parlament accepta l’incumbensa per introducir ina cumissiun da bajegiar
Il parlament communal da Ilanz/Glion ha acceptà unanimamain l’incumbensa inoltrada d'Ivo Frei e plirs consutsegnaders che prevesa l’introducziun d’ina cumissiun da bajegiar. Cun quai duai vegnir fatg il pass per ina revisiun parziala da la lescha da bajegiar, sco reacziun a criticas persistentas envers l’Uffizi da bajegiar. Cun l’approvaziun surdat il parlament uss l’incumbensa d’elavurar ina proposta concreta per ina revisiun parziala da la lescha da bajegiar cun ina cumissiun da bajegiar ch'ha ina furma u l’autra.
Siat survegn ina nova rundella
La suprastanza communala da Glion ha approvà mez mars la construcziun d'ina nova staziun d'auto da posta a Siat. Mesemna saira ha ella infurmà las parlamentarias ed ils parlamentaris. La vischnanca preveda ina rundella per autos da posta al nov terminus tar il Tuf. Quai per vehichels d'ina lunghezza da 12 meters. Questa rundella duai remplazzar la staziun actuala che sa chatta amez il vitg sper la baselgia. La nova fermada sto resguardar diversas prescripziuns, tranter auter la lescha per persunas cun impediments.
Andreas Pfister, il manader da planisaziun e construcziun da la vischnanca da Glion, declera che la nova fermada è necessaria, era pervia da la plazza da gieu vischina.
La vischnanca ha giuditgà ch'i saja necessari da far ina fermada adattada per glieud cun impediments, pertge nus avain ina gronda plazza da gieus dasperas cun blera glieud la stad.
La posta haja menziunà pliras giadas difficultads d'ir fin amez il vitg durant l'enviern. Ils custs per la nova rundella muntan a var 250'000 francs, quai èn duas giadas dapli che la varianta planisada oriundamain en il preventiv per l'onn 2024. Tenor la vischnanca surpiglia il chantun var 120'000 francs dals custs.
Nova rundella per auto da posta a Siat
-
Bild 1 von 2. A Siat tar l'uschènumnà Tuf duai dar ina fermada ed ina rundella per l'auto da posta. La tegia ed ils molocs davos quella duain vegnir dischlocads. Bildquelle: RTR.
-
Bild 2 von 2. La fermada da posta actuala amez il vitg na correspunda betg pli a las pretensiuns d'ozendi. Bildquelle: RTR.
Las opiniuns en il vitg èn divididas: intgins beneventan il nov lieu, auters na vesan betg il senn da dischlocar la fermada d'amez il vitg sisum il vitg.
La vendidra da la stizun dal vitg, Claudia Heini, è malcuntenta perquai che la nova staziun pudess reducir la clientella che vegn savens direct en stizun. Plinavant ston las vendidras mirar co far cun las chista cun il paun che vegnan cun la posta.
Nus avain bler glieud che vegn cun l'auto da posta e vegn anc en tar nus.
Tenor Andreas Pfister daventia il provediment meglier ch'enfin qua. Sper la rundella tar il Tuf preveda la vischnanca in’ulteriura fermada datiers da la chasa da sentupada, l’anteriura chasa da scola.
Renovaziun da l’exposiziun permanenta dal Museum Regiunal Surselva
Il Museum Regiunal Surselva planisescha ina renovaziun generala da sia exposiziun permanenta. Il project «tipic Surselva» che custa totalmain 1,1 milliuns francs duai modernisar l'exposiziun e sa focussar sin las particularitads da la Surselva. Il chantun Grischun haja gia garantì ina contribuziun da 100'000 francs, Surselva Turissem sustegn il project cun 30'000 francs e divers auters sponsurs e fauturs pajan 700’000 francs. Il parlament communal da Glion ha approvà unanimamain ina contribuziun da 200'000 francs da vart da la vischnanca.