-
Bild 1 von 6Legenda: La chasa Luis, da Christoph Pally che vegn fatga actual da la societad cooperativa. RTR, Gionduri Maissen -
Bild 2 von 6Legenda: Marcel Levy ha ina gronda passiun, l'energia solara. El è president da la societad cooperativa. RTR, Gionduri Maissen
-
Bild 3 von 6Legenda: Ils collecturs da solar èn dad ina vart dal tetg gia montads. RTR, Gionduri Maissen
-
Bild 4 von 6Legenda: Da tschella vart dal tetg èsi anc da montar ils collecturs solars. RTR, Gionduri Maissen
-
Bild 5 von 6Legenda: Gia dapi quasi 20 onns èn montads collecturs da termica per stgaudar l'aua. Quels restan sin tetg. RTR, Gionduri Maissen
-
Bild 6 von 6Legenda: Ils dus commembers da la cooperativa vida la lavur. RTR, Gionduri Maissen
La societad cooperativa per construir en atgna reschia in implant solar è naschida il mars 2020. Atgnamain è l’idea simpla. Mintga possessur d’ina chasa po sez construir ses implant solar. La cooperativa dat alura sustegn en moda da tips, ma era cun sa gidar. Uschia duai quai esser pussaivel da construir a moda autonoma l’implant solar che pussibilitescha da producir energia a moda autarca.
Emprim project a Curaglia
Vid ina chasa da vacanzas a Curaglia vegn uss construì l’emprim tal implant solar en il Grischun. Il possessur da la chasa ha prendì quasi in mais vacanzas per far las lavurs. Sustegni vegn el dal president da la societad cooperativa Marcel Levy. Lez ha ina experientscha da 30 onns en la construcziun d’implants solars e sa gida cun cussegls. La lavur fa però il possessur. Uschia pon era vegnir spargnads custs.
Ditg fin che societad cooperativa era fundada
Sco il president da la societad cooperativa Marcel Levy ha ditg saja l'idea da fundar la societad cooperativa naschida gia dapi il 2015. Ma alura n'avevan betg tut ils interessads era la peda da far quai pass. Pertge annunziar, scriver statuts e tut las lavurs administrativas ston era vegnir fatgas. Uss il mars 2020 han alura 8 persunas fundà la societad cooperativa ed els sperian che anc dapli persunas han l'interess da sa participar. Ins na stoppia betg esser possessur d'ina chasa u d'in implant solar per far part a la societad cooperativa, di Marcel Levy. En la Bassa hajan talas societads cooperativas in grond resun, ma betg dapertut saja reglà tuttina sco en il Grischun. Qua na stoppia in possessur betg surdar ina cumpart da l'electricitad a la cooperativa u era betg daners. Ma senza bler idealissem na fiss in tal engaschi betg pussaivels, di Marcel Levy.