En il chantun Grischun hai dà in enorm svilup ed augment d’implants solars ils ultims diesch onns. Sco l’Uffizi chantunal d’energia e traffic scriva sin dumonda datti diesch giadas dapli implants solars ch'avant diesch onns. Era la producziun d’energia è creschida enorm. Uschia vegniva il 2010 producì circa 10 uras gigawatt energia ad onn cun implants solars. Il 2019 era quella producziun sin 65 uras gigawatt ad onn.
Ina persuna dovra fin 2’000 kWh electricitad
Cura ch’ins discurra da consum d’energia vegni inpau cumplitgà. La finamira dal consum d’energia èn tranter 1’500 e 2’000 uras kilowat per persuna ad onn. Quai è ina norma relativa. Sch’ins va uss da quai anora ch’ils implants solars en il Grischun produceschan ad onn circa 65 uras gigawatt electricitad alura pudessan pia radund 32’500 persunas vegnir provedidas cun tala electricitad. Quai èn dentant adina cifras teoreticas.
Energia d'implants solars
Nua datti ils blers implants solars en il chantun?
L’Uffizi chantunal d’energia n’ha betg rimnà las cifras exactas nua che quai ha propi ils pli blers collecturs solars sin ils tetgs. Da principi èsi impurtant ch’il sulegl dat stediamain là nua ch'i vegn installà las cellas fotovoltaicas. Uschia èsi da grond avantatg d’avair sur onn bler sulegl. Chasas en vitgs nua ch’il sulegl svanescha per intginas emnas durant l’enviern n’èn betg propi adattadas per implants solars.
Adina dapli indrizs solars
En la lescha revedida d’energia èsi previs che mintga chasa nova ha da producir sezza ina cumpart d’electricitad. Quai vegn per gronda part fatg cun implants solars. Uschia èsi da quintar che anc dapli ovras solaras vegnan a vegnir fatgas sin ils tetgs en il chantun.
