1'280 moduls fotovoltaics vegnan installads sin il mir da serra Albigna in Val Bregaglia. Questa installaziun sin 2’100 meters sur mar, che vegn realisada dal EWZ, è cun ses 670 meters lunghezza il pli grond implant autalpin.
L’idea da generar forza electrica cun panels fotovoltaics sin il mir da serra Albigna è en sasez gia veglia. Las circumstanzas, per la realisaziun sajan però pir ussa fitg bunas, cunquai ch’ils panels solars sajan vegnids bler pli favuraivels.
-
Bild 1 von 5Legenda: In implant solar da 670 meters lunghezza RTR/U. Morell -
Bild 2 von 5Legenda: L'implant spordscha forza natirala per 210 chasadas turitgaisas RTR/U. Morell
-
Bild 3 von 5Legenda: 1280 panles solars, quai dat il pli grond implant solar autalpin RTR/U. Morell
-
Bild 4 von 5Legenda: Las lavurs avanzan bain RTR/U. Morell
-
Bild 5 von 5Legenda: Il project custa radund 700'000 francs RTR/U. Morell
Bler dapli forza durant ils mais d’enviern
Il project da pilot dal 2018 ha mussà, ch’ils panels solars, che eran vegnids montads sin il mir vers sid, hajan generà dapli forza che spetgà. Quai saja, pervi da la radiaziun intensiva dal sulegl, pervi da la bell’aura, pervi da la reflexiun da la naiv e las temperaturas bassas. Uschè era cler, ch'il project da pilot dess daventar realitad. La fin da zercladur 2020 han ils responsabels cumenzà cun la montascha dals 1'280 panels solars ed ils responsabels fan quint, che quest’installaziun possia producir a la fin da settember forza electrica natirala.
- 1280 panels solars sin ina lunghezza da 670 meters
- L’implant solar producescha var 500 uras megawatt forza
- Forza natirala per var 210 chasadas turitgaisas
- Duvrà var 6000 meters cabels per l'entira installaziun
- Panels vegnan montads en in angul da 78 grads – uschia na tatga la naiv betg sin ils panels
- Emprima producziun da forza natirala – la fin da settember 2020
- Investiziun da radund 700'000 francs