Ospital regiunal Surselva - In camiun per trenar operaziuns dal chalun e da la stgaina

Ruttadiras vi da las chommas, spezial vida la stgaina ed il chalun, audan tar las operaziuns da standard en l’ospital regiunal a Glion. Uss mida l’ospital il furnitur dal material medicinal e lez ha persuenter tramess ses camiun d’exercezi a Glion. Quai saja ina buna schanza per tut las medias ed ils medis giuvens da rimnar emprimas experientschas cun il material nov, ma era da pudair exercitar operaziuns a moda effectiva. Talas purschidas na chattian ins betg savens, sulet tar grondas messas u tar ospitals fitg gronds, di il schefmedi da l’ortopedia Sebastian Ulsamer.

Era per las medias assistentas in novum

Selina Pfister ha lavurà gia en plirs ospitals sco practicanta e la finala sco media assistenta. Dapi curt è la dunna oriunda da Schlans uss a l’ospital regiunal a Glion ed ella di ch’ella n’haja fin uss anc mai giu ina tala purschida nua ch’ins po exercitar simplamain durant la pausa da mezdi ed ella apprezieschia quai fitg. Il focus dal studi è surtut sin la teoria ed il camiun empermetta da pratitgar era gist cun il nov material e quai rinforza la cumpetenza pratica da las medias assistentas ed ils medis assistents. Ina raschun da porscher questa scolaziun è era ch’ins vul restar attractivs sin il martgà d’ospitals e quai saja reussì ils ultims onns, perquai ch’els hajan adina puspè practicantas e practicants che returnan a Glion sco medias assistentas e quai saja era ina finamira, di Sebastian Ulsamer.