Sonda, ils 23 da december po ina innovaziun mundiala cumenzar cun sia purschida. Il FlemXpress, in taxi pendicular, collia en il futur il vitg da Flem cun pliras staziuns en la muntogna. La pendiculara, cun ina tecnologia unica sin l’entir mund, transporta giasts da Flem a Foppa e vinavant a Startgels. Las trais ulteriuras secziuns (Segnes, Nagens sura e Cassons) èn gia en construcziun e vegnan messas en funcziun l’enviern 2024/25.
L’Uffizi federal da traffic ha terminà cun success tut ils tests, uschia che nagut impedescha pli in cumenzament segir dal manaschi. Il FlemXpress sa distingua tras sia tecnologia da manaschi unica che sa numna «Ropetaxi».
Novitad mundiala or da la Svizra
La nova tecnologia è vegnida sviluppada specificamain per quest project da las pendicularas Arena Alva SA a Laax e da la Bartholet Maschinenbau SA a Flums. Il viadi sin il traject vegn fatg sco usità vi da la suga. En las staziuns sa movan las cabinas dentant autonomamain sin las lingias. Quai grazia ad in agen manaschi electric sin mintga cabina. Sche las gondlas na vegnan betg duvradas, na sa chattan quellas era betg sin il traject a suga. Tras quai po il consum d’energia da la pendiculara vegnir reducì cleramain. Ins stoppia simplamain eleger ina mira e smatgar il buttun.
A partir da l’enviern 2024/25 vegn il FlemXpress ad esser en funcziun durant l’entir onn cun tut las tschintg secziuns.
