Ina gronda sfida tar il FlemXpress è ch’igl è insatge dal tuttafatg nov. Tar bleras chaussas na san ins betg propi quant temp ch’ins dovra per far la lavur. Claudio Casutt ch’è l’inschigner responsabel per il project è dentant optimistic da pudair tegnair en ils termins. L’avertura da l’emprima secziun è previsa il december.
Da bell’aura è la prestaziun fitg auta.
La bun’aura da questa stad ed atun gidan da vegnir bain vinavant cun la lavur. Da povr’aura dat la prestaziun ensemen fin tar 30%. Lura va tut pli ditg. L’aura è in tschert risico che mintga impressari sto surpigliar tar tut ils projects da bajegiar, di Claudio Casutt en il profil. Il mument ha el emnas da lavur da 60 fin 65 uras.
I dovra bler per ch’jau auz la vusch.
Adina puspè participescha la firma Casutt Wyrsch Zwicki a concurrenzas. Quai saja in risico sch’ins fa ina concurrenza. Ins investescha per part 50 fin 100’000 francs. Igl è la motivaziun dal sportist. Sch’ins n’ha betg la finamira da gudagnar, lura èsi meglier da na betg participar a talas concurrenzas.
In meter è in meter. Ins ha cleras cifras e cleras leschas. Sch’ins ha in ressort nua ch’i va per emoziuns èsi bler pli grev da manar.
