Enstagl da spazzar la lingia Flem-Foppa-Naraus gia il 2022, duai da nov capitar la primavaira 2023, sco la Cassons SA scriva. Ina da las raschuns saja ch'ins n'haja betg chattà ina cunvegna cun ina partida che haja inoltrà protesta. Uschia na possian ins betg cumenzar a construir las proximas emnas. E cunquai saja il privel grond, ch'ins na possia betg prender en funcziun l’etappa Flem-Foppa-Startgels sin l'entschatta da la stagiun 2022/23.
I na fa nagin senn da sdrappar giu las pendicularas veglias sch’i n’è betg segir che las novas pendicularas fissan prontas per la nova stagiun. Uschiglio na fiss in entir territori a Flem betg collià cun pendicularas il proxim enviern. Quai n'havain nus betg vulì ristgar
Sco segunda raschun numna la Cassons SA la situaziun adina pli difficila da cumprar material da construcziun, en connex cun la guerra en l’Ucraina. Ord questa situaziun naschian ulteriurs ristgs, che pudessan retardar massivamain las lavurs e procurar per custs da construcziun drasticamain pli auts.
Sin il termin final per il remplazzament da las pendicularas existentas cun ina pendiculara da cabinas per 10 persunas na duess il recurs avair naginas consequenzas. Sco Markus Wolf ha ditg a RTR fissi il mender cas in retardament d'in onn per la pendiculara da 5 secziuns che saja suenter 40 onns en funcziun nagina disgrazia.
