Nadal - Chant per la pasch – concert dal chor Surselva cun orchester

Suenter il project «Cant el Museum» ha il chor da project Surselva quest onn preparà ina ovra pli gronda e quai cun orchester e solistas e solists. Uschia chanta il chor la messa «credo» da Wolfgang Amadeus Mozart e l’oratori da Nadal da Camille Saint-Saëns. Il motto actual dal project è «Cant per la pasch», declera il dirigent Rest Giusep Tuor. Per el èsi impurtant da chattar sfidas e quai saja ina, pertge talas ovras da la litteratura mundiala da musica na possia in chor dal vitg usità betg realisar. I saja gia adina stà l’intenziun dal chor Surselva da pudair chantar talas ovras, di il dirigent che maina il chor dapi 30 onns.

Chattà avunda vuschs dad umens

Per pudair realisar gronds projects èsi impurtant d’avair las vuschs equilibradas e quai saja quella giada il cas, di Rest Giusep Tuor. Ils ultims onns saja quai stà grev da chattar avunda vuschs dad umens, ma quella giada haja el in chor grond cun 51 persunas e quai fetschia natiralmain grond plaschair e dettia era gronda motivaziun d’impunder il temp en quest project. Ma la sfida dal chor Surselva saja adina stada quella da pudair realisar projects ch’in chor dal vitg na possia betg far. Ed il dirigent percorscha grond engaschi da tuttas e tuts.

Anc avunda bigliets

Las preparaziuns per ils dus concerts en la claustra a Glion da proxima fin d’emna èn en la fasa finala. Ma cun la precumpra da bigliets online ha quai dà difficultads l’ultim temp, di la presidenta Renata Gienal. Ma els hajan anc avunda bigliets per omadus concerts. Sch'i dettia difficultads possian ins telefonar u direct a Surselva turissem ni a la presidenta. Els vegnian era a porscher ina cassa da la saira e sperian sin blera glieud. Pertge il motto «Cant per la pasch» saja in motto tipic da Nadal. La pasch saja gist en il temp dad oz cun massa conflicts mundials ina da las finamiras globalas che l’entira umanitad basegnia, declara il dirigent Rest Giusep Tuor.

Registraziuns da chors