A Mustér è vegnì observà venderdi in luf-tscherver en in lieu abità. Quest animal na vegnia betg vis savens, sco Arno Puorger da l'Uffizi da chatscha e pestga dal Grischun ha ditg sin dumonda da RTR. I pudess esser ch'il luf-tscherver saja en in nausch stadi, quai in motiv pussaivel per el da s'avischinar a l'uman. Els veglian uss observar il luf-tscherver per sclerir sch'i dovra mesiras da vart da l'uffizi da chatscha u sch'i sa tractia d'in cas extraordinari.
Sch'insatgi fa in'observaziun, sco er tar il luf, per plaschair annunziar subit a l'uffizi da chatscha.
Arno Puorger ha fatg attent che tgi che fa observaziuns da lufs-tscherver u dal luf duai annunziar quella uschè spert sco pussaivel a l'Uffizi da chatscha e pestga dal Grischun. Uschia possian ils guardiachatscha gist ir al lieu e far ina valitaziun pli detagliada.
Ch'in luf-tscherver vegn vis è fitg rar, e ch'el vegn vis durant il di en vischinanza da vitgs è in eveniment spezial.
Er da sajettar il luf-tscherver saja pussaivel. Sche el na po betg surviver pli ed esser sur sasez en la natira, lura èsi lubì a l'uffizi da sajettar l'animal.
