34 onns ha Andri Hendry lavurà en l'administraziun communala da Mustér – da quels 25 sco chanzlist. En quest temp ha el vis a vegnir ed ir inqual persuna e persunalitad. Ussa saja il temp entant madir per ina midada, da surdar dapli cumpetenzas a novas forzas pli giuvnas, vegn Andri Hendry cità en ina communicaziun da la vischnanca.
Andri Hendry banduna l'administraziun communala da Mustér sin la fin da settember 2024. Sco quai che la vischnanca scriva, veglia el ir novas vias e surpigliar ina nova sfida professiunala.
Mustér sa prepara per las sfidas futuras
Per esser semtgà per las pensiuns che stattan avant porta e las sfidas futuras, è la suprastanza communala s'occupada ensemen cun in biro da cussegliaziun extern intensivamain ils mais passads cun las structuras operativas futuras da la vischnanca. La finamira da la nov'organisaziun saja ina structura simpla ed effizienta, scriva la vischnanca. Las vias duain esser curtas, agilas e speditivas. Questa structura nova vul Mustér introducir en il decurs dals proxims mais ed implementar ella sin il pli tard il prim da schaner 2025.
Or da l'archiv:
Avant dapli che 200 onns ha il scrivant cumenzà a scriver protocols da vischnanca a Mustér. Quels sa differenzieschan bravamain dals protocols da 2021. Cun Andri Hendry ha RTR dà in sguard en ils protocols vegls.