Anne-Louise Joël ha entschet avant otg onns sco manadra da la Casa d'Angel, quai cun in pensum da 30%. Il manaschi cultural è creschì durant quest temp, ses pensum da lavur è dentant sa dublegià. La stad 2015 aveva la Casa d'Angel avert sias portas per in'exposiziun dal Museum d'art dal Grischun. Dapi alura ha la vischnanca Lumnezia incumbensà la Fundaziun da cultura da la Lumnezia da crear en quest bajetg in lieu da cultura per la val.
Igl è stà lavur da pionier, i n'è betg usità ch'ins ha qua ina lavurera da cultura professiunala.
Dapi l'entschatta haja il cussegl da fundaziun dà maun liber ad ella, il cussegl haja gì bler fidanza, declera Anne-Louise Joël. Quella libertad creativa, cumbinada cun la lavur administrativa, saja stada exact il dretg per ella. En il fratemp è la Casa d'Angel creschida ad ina pitschna interpresa. Ella n'ha betg mo dà lavur a la manadra, mabain er ad ina persuna en il secretariat ed a las «angelistas», las persunas che fan la surveglianza durant las exposiziuns. Plinavant ha la chasa pliras manadras da projects, saja quai per il Campus convivenza u per il Café Romontsch.
Igl è bunamain il pli bel da savair che jau sun vegnida da stgaffir plazzas.
A ses successur u sia successura po Anne-Louise Joël surdar in manaschi intact che ha fatg l'onn passà ina svieuta da var 390'000 francs, tge ch'è var sis giadas dapli svieuta ch'en l'emprim onn. Plinavant ha la Casa d'Angel pliras cunvegnas che valan anc in pèr onns.
Ma daco banduna ella la Casa d'Angel, il lieu nua ch'ella ha investì tanta passiun? Suenter 10 onns haja ella fatg tut las lavurs ch'èn da far en il manaschi. L'exposiziun actuala haja ella schizunt pudì curatar. Ella haja dà bler temp a questa lavur e fatg quai cun corp ed olma. I na saja betg simpel dad ir, ma i saja in bun mument, di Anne-Louise Joël.
Davosa exposiziun sco manadra, emprima sco curatura
La chasa da cultura, Casa d'Angel, preschenta mintg'onn ina nova exposiziun. Quella da quest onn sa numna «Hehe! Sils fastitgs da nanins, baubaus e buttatschs». Nov èsi, che la manadra da la Casa d'Angel, Anne-Louise Joël, ha per l'emprima giada curatà l'exposiziun.
Il clom dal «Hehe» beneventa las visitadras ed ils visitaders. Silsuenter suonda ina tschertga sin ils fastizs da las creatiras or da las ditgas da la Val Lumnezia e da la Val S. Pieder. Quest «Hehe» è ina da quellas creatiras ed ils visitaders han da chattar ora tge creatira ch'el è. Dapertut hai fastizs vi da la paraid ch'inditgeschan nua ch'i va atras.
Jau hai gugent che las chaussas han in'istorgia. I sto dar il regl da vulair ir vinavant.
Ins po tadlar las ditgas tar posts auditivs ed er vegnir a savair tgi che raquinta questas istorgias. Fotografias vi da la paraid d'ina stiva veglia cun tavladira da lain mussan las raquintadras ed ils raquintaders. Plinavant mussa in'animaziun la lavur da quels che rimnavan las ditgas, per exempel Caspar Decurtins ch'ha publitgà la Crestomazia, ina rimnada da texts d'avant l'onn 1880, tranter auter er ditgas.
L'exposiziun tematisescha er las ditgas e l'inspiraziun ch'ellas èn per artistas ed artists. Sper las notas d'ina chanzun da Gion Antoni Derungs ed il process da furmaziuns, datti er d'udir chanzuns sco «Salischina» d'Alexi e Marcus, u er da contemplar dissegns da Mathias Durisch ch'èn ina nova interpretaziun da las ditgas en furma dal comic «Crestomat». Plinavant han las ditgas inspirà il gieu da computer «Mundaun» da Michel Ziegler. Il viadi tras l'exposiziun e bajegià si en furma ludica ed è patratgà per grond e pitschen.
L'exposiziun cuzza anc enfin la fin da mars 2024.
