Il dumber da lufs è creschì considerabelmain quest onn. Il davos temp ha l'Uffizi da chatscha e pestga annunzià quasi mintga di novs trieps en il Grischun e tge triep che ha nua quants chagniels. Quest augment dal dumber da lufs ha motivà ils purs da s'organisar en cas da stgarps ed uschia gidar in l'auter en cas da basegns. L'Uniun purila grischuna ha organisà ina defensiun cunter lufs per sustegnair il purs pertutgads da stgarps.
L'emprim mument suenter in'attatga da lufs è ina situaziun extraordinaria per ils pertutgads. Els ston per ina dustar ils cadavers, rimnar ils animals blessads e metter en il segir il rest da la muntanera. E sper questa lavur supplementara vegn tiers il stress mental co vegnir a fin cun da quellas situaziuns.
L’Uniun purila grischuna ha organisà sur las uniuns purilas gruppas d’intervenziun. Dasper rimnar cadavers e dar sustegn mental han ils gidanters a disposiziun material per scurrentar ils lufs. En spezial èn quai cameras a radis infracotschens per vesair la notg, rachetas da glisch e petardas da detunaziuns per scurrentar ils lufs
Avant che scurrentar ils lufs sto il responsabel da la defensiun cunter lufs prender si contact e coordinar l'agir cun la surveglianza da chatscha. Lezza sto dar il consentiment per ch’ils purs pon sezs scurrentar il luf.
Per evitar ch'ils gidanters fetschian insatge che na correspunda betg a las leschas vertentas ha l'uniun purila coordinà en lur preparativas las cumpetenzas cun ils uffizis pertutgads. Quai èn l'Uffizi per la segirezza da victualias e la sanadad d'animals, l'Uffizi da chatscha e pestga ed il Plantahof. La decisiun finala sch’ils purs dastgan scurrentar lufs è tar il survegliader da chatscha local. In cas dal davos fanadur en la vischnanca da Tujetsch mussa dentant ch'i n’è betg gist simpel da survegnir la lubientscha per duvrar il material explosiv per scurrentar ils lufs. In pur da nursas che vuleva far quai n’ha betg survegnì la lubientscha dal survegliader da chatscha.
A Tujetsch nua ch’il survegliader da chatscha è en il medem mument era president communal ha la vischnanca decretà in scumond absolut da far fieu. Cun quai è la pussaivladad da spaventar ils lufs cun fieu artifizial stada giud maisa
La lavur ed il material che vegn organisà tras l’Uniun purila grischuna cun sia defensiun cunter lufs surpiglia per la gronda part la Confederaziun ed ils custs restants il chantun Grischun. Tge summa che quai è exact n’ha Sandro Michael betg savì u vulì dir. Quai dependia quantas acziuns d'agid ch'i dettia la finala en il decurs da l'onn. I sa tracta tenor el d'ina summa bassa da sis cifras.
La situaziun è en il mument nuncuntentaivla. Nus avain tschertgà alternativas tar las rachetas da glisch e las petardas da detunaziun. En il mument na datti simplamain nagut auter. En situaziuns cun privel da fieu na pudain nus uschia far nagut.
