A Vrin en Surselva ha in luf stgarpà pliras nursas la notg da gievgia sin venderdi passà. Durant ina pasculaziun cumina betg protegida haja in luf attatgà ina muntanera da 53 nursas ed agnels, scriva la FMR. Il luf haja stgarpà quatter agnels ed ina nursa, dus ulteriurs agnels sajan svanids.
Sco il manader da l'Uffizi da chatscha e pestga, Adrian Arquint, ha declerà envers la FMR aveva l'uffizi orientà ils purs da la regiun ch'in luf saja en la vischinanza da Vrin. Il chantun indemnisescha ils donns chaschunads.