Ils lufs en Surselva, quai è stà il tema da la saira d'infurmaziun a Glion, tranter auter cun l'inspectur da chatscha, Adrian Arquint, ed il cussegliader al Plantahof, Jan Boner. Ed ils lufs n'han betg fallà da chaschunar emoziuns. Durant la runda da dumondas han ils purs ed er auters abitants pudì exprimer lur quitads. Tema gronda è ch'ils lufs pudessan en avegnir betg chalar cun stgarpar «be» animals pli pitschens sco nursas e chauras, mabain ch'els pudessan er cumenzar a stgarpar animals pli gronds. Intgins purs vesan lur muntaneras da vatgas-mamma en privel.
Il luf na mida betg be il sa cuntegnair da la selvaschina, mabain er quel dal carstgaun en regiuns nua ch'il luf viva.
Infurmaziuns davart derasaziun e protecziun
Cumenzà ha la saira d'infurmaziun cun in referat dal manader da l'Uffizi da chatscha e pestga Adrian Arquint. El ha infurmà davart l'istorgia dal luf e la derasaziun da quel durant ils ultims onns. Jan Boner è cussegliader al Plantahof ed ha silsuenter declerà la situaziun davart la protecziun da muntaneras en il chantun Grischun.
-
Bild 1 von 2Legenda: Il manader da l'uffizi da chatscha e pestga, Adrian Arquint. RTR, Reto Pfister -
Bild 2 von 2Legenda: Il cussegliader al Plantahof, Jan Boner. RTR, Reto Pfister
Ils purs èn malcuntents
Da vart dals purs datti ina malcuntentientscha envers la situaziun mumentana. Anc adina vulessan blers avair davent il luf. Quai è dentant ina illusiun.
La mesadad dals lufs ch'igl ha ussa tanschess. Il rest duessan ins reparter sin il rest da la Svizra, alura emprendan quels era tge che quai vul dir
Ina schliaziun co ei savess ir vinavant cun ils lufs en Surselva ha nagin pudì preschentar.
Ord l'archiv:
L'entschatta schaner è il luf stà a Sursaissa. El è vegnì fotografà d'ina persuna privata en il «Kinderland» da la scola da skis e quai betg durant la notg, mabain la bun'ura. Il chantun ha suenter piglià mesiras per spaventar il luf dal vitg.
RTR novitads 06:00