L'Open Air Lumnezia n'è anc betg vendì or in mais avant il festival. Entant èn dentant ils bigliets da sonda vendids or, sco quai ch'ils organisaturs han communitgà en las raits socialas. Ils davos onns na devi gia mais ordavant nagins tickets pli. Il president dal comité d’organisaziun Norbert Cavegn di dentant che la prevendita giria fitg bain.
Quants bigliets ch'èn anc sin fiera n'ha Norbert Cavegn betg tradì. En tut vegnan vendids 18'500 bigliets. L'Openair Lumnezia ha lieu dals 20 fin ils 23 da fanadur a Degen.
Vender tickets betg pli uschè simpel sco ina giada
Malgrà ch'il comité è cuntent, giajan ils tickets betg pli davent uschè bain sco ina giada, di Norbert Cavegn. Quai giaschia forsa vi da la gronda purschida da festivals e concerts suenter il temp da pandemia u er vi da l'aura che n'ha enfin anc avant curt betg propi envidà da cumprar bigliets per festivals.
Cun l'organisaziun è il comité d'organisaziun sin buna via, i giaja uss en la «fasa chauda» in mais avant l'occurenza. Norbert Cavegn e ses team èn actualmain vid blera lavur da detagl. Gist d'organisar la logistica cun ils cups reutilisabels saja ina gronda sfida.