Puspè datti pliras purschidas, sco ateliers nua che quai vegn discurri sur da tematicas sco la polarisaziun da las opiniuns, u sur da schurnalissem e democrazia. Questas purschidas han tradiziunalmain lieu en la claustra da las muniessas a Glion, ma els veglian era porscher dapli occurrenzas en la citad da Glion, di la responsabla per la communicaziun dal Ilanzer Sommer, Rea Furrer. Uschia è surtut la discussiun publica 3x3x3 uss en la chasa Cumin e duai animar da vegnir a tadlar e discutar, di Furrer. Surtut tar la purschida nua che 9 differentas persunas or da las spartas schurnalissem, cultura e politica discurran, saja la furma da dialog giavischada, pertge impurtant saja da discutar cun persunas ch'han era ina autra opiniun, di Rea Furrer.
Era il rumantsch ha ses plaz
Duas occurrenzas han in direct connex cun il rumantsch. Uschia datti duas spassegiadas cun las tematicas «Lungatgs sco punts alla libertad» e «Zugezogene und Einheimische» che sa deditgeschan a la tematica da la lingua e la convivenza en Surselva. In auter punct impurtant è che persunas cun domicil en Surselva survegnan il pass da quels dis per in pretsch pli bass, enstagl da 450 francs, 250 francs, di Rea Furrer. Questa purschida è era vegnida nizzegiada, di la dunna che viva cun sia famiglia a Schlans. In dals puncts culminants vegn era ad esser il Poetry Slam en las localitads dal Cinema Sil Plaz che vegn ad esser sonda saira, quasi sco finiziun. Dasperas datti da vesair blers films ed en la claustra da Glion è da vesair ina exposiziun sur da Clara Ragaz, ina da las pionieras dals dretgs da dunnas ch’è naschida avant 150 onns.
