A Salischinas duai dar in lai, in campadi e pussaivladads da glamping. Ils custs persuenter èn calculads cun radund 30 milliuns francs. Il TCS dueva contribuir ina summa da radund set milliuns francs. La fin dal 2024 saja l’interpresa dentant sa retratga dal project, ha ditg il president communal da Sumvitg Patrick Schaniel il venderdi saira ad ina sentupada d’indigenas e d’indigens.
Sin dumonda da la FMR ha Schaniel explitgà, ch’i deva ina cunvegnientscha d’intenziun cun il TCS. Uss restia il contact tuttina, perquai che l’interpresa haja anc adina l’interess da sa participar vi dal manaschi e da commerzialisar las purschidas a Salischinas pli tard. Il TCS posseda e maina ina rotscha plazzas da campar en Svizra, tranter auter era quella a Mustér.
Nus essan gia en discussiun cun in nov investider.
Il temp tranter Nadal e Bumaun han ils responsabels per il project Lag Salischinas tschertgà intensivamain in’autra soluziun. Il resultat saja in auter investider e quel ha tenor Patrick Schaniel la medema filosofia. Dapli detagls sajan da spetgar questa primavaira.
Projectaziun cuntinuescha
Las proximas emnas duain succeder ulteriurs pass en cooperaziun cun quest investider. Quel beneventia la purschida planisada – cun lai, campadi e glamping. Quai che pertutga il model da fatschenta haja l’investider dentant ideas per in’autra via, ha Patrick Schaniel ditg.
Actualmain sa fatschenta la vischnanca da Sumvitg era da la revisiun da la planisaziun locala.
Or da l'archiv
