Il project «Lag Salischinas» è in'ulteriura giada vegnì preschentà a la populaziun da Sumvitg. E quasi normal è ch’il perimeter vegn stuschà e preschentà en in auter lieu che l’ultima giada. Ma quella giada hajan els chattà il lieu definitiv, sincerescha il president communal Patrick Schaniel suenter la preschentaziun publica. L’idea oriunda da stuschar las pitgas d’auta tensiun è sa mussada sco betg realisabla e cuzzava simplamain memia ditg. Perquai hajan ins uss decis da betg stuschar la lingia d’auta tensiun, mabain la via chantunala. Uschia vegn quella manada en il futur sut las lingias d’auta tensiun ed uschia sa porscha spazi per la realisaziun dals trais lais planisads e da las purschidas da glamping, uschia han ils responsabels orientà.
Plazza da ballape svanescha sut l’aua
Il lieu uss planisà per ils lais è pli datiers a la plaunca e là nua che la plazza da ballape sa chatta il mument. Ins haja discurrì cun tut ils responsabels, era cun il club da ballape ed ins veglia tschertgar ina soluziun che cuntentia tuts. Per la realisaziun dal project «Lag Salischinas» saja quai la soluziun optimala, perquai sut las lingias d’auta tensiun na possian il campadi e autras installaziuns betg vegnir realisads. La part dal campadi è perquai planisada en il sid dals lais e duai vegnir colliada cun in sutpassadi cun las purschidas da recreaziun dasper ils lais. Era duajan ils lais esser accessibels dal tuttafatg per l’entira populaziun e betg serrads giu, uschia ils responsabels dal project. Er il puresser amez il futur campadi duai vegnir realisà vinavant e porscher in argument da vendita exclusiv. Ma l’entir project furmia ina purschida ch’ins na chattia betg anc ina giada e quai saja in dals puncts impurtants per pudair realisar tut, uschia ha Andras Bärtsch da l’interpresa «Quant» orientà.
Proximamain inoltrar project al chantun
La finamira è d'inoltrar anc quest mais il project per ina preexaminaziun al chantun. Quai saja in pass impurtant e la speranza è gronda ch’il project chattia bainvulientscha a Cuira, di Patrick Schaniel. Els sperian ch’il chantun prendia enconuschientscha dal project e ch’els possian lura cuntinuar cun las adattaziuns da la planisaziun locala ed ils ulteriurs pass. Era cun las organisaziuns d’ambient hajan els gia discutà e da princip era survegnì signals positivs, uschia Schaniel. Tuttina han quellas uniuns ed organisaziuns il dretg da far recurs cunter la planisaziun locala ed ils ulteriurs pass. Era la populaziun da Sumvitg vegn a stuair votar sur dal project e surtut sur da la contribuziun finanziala che vegn probabel a surpassar la summa d’in milliun francs ed uschia a stuair vegnir decidida a l’urna, ha declerà il president communal da Sumvitg.
Las proximas sfidas èn multifaras, ina è la tschertga da sponsurs, donaturs e fauturs. Qua sperian els sin sustegn dal chantun e da fundaziuns, ma era sin sponsurs, ha declerà il president communal. Er ils custs èn creschids, uschia vegn la summa uss stimada sin radund 30 milliuns francs. Sche tut va tenor plan duajan las lavurs da construcziun cumenzar il 2027 e durar almain dus onns e mez.
