La Z Capital Group venda puspè l'hotel Waldhaus a Flem. Venderdi ha l'interpresa americana confermà quai envers «Hotel Inside». Cun excepziun d'in team da mantegniment perdan tut las emploiadas ed ils emploiads lur lavur, ha la vischnanca da Flem ditg envers la «Südostschweiz». Sper l'hotel è er il restaurant Epoca pertutgà.
Commentari dal president da Hotelleriesuisse
Surstà da las novas dal Hotel Waldhaus a Flem na saja Andreas Züllig betg. Che l'hotel da luxus haja problems saja encunuschent. L'investur american ch'ha cumprà l'hotel suenter il concurs il 2015 haja dentant fatg il sbagl da betg sa posiziunar cleramain sin il martgà ed era la constanza en la direcziun e tar il persunal sco tal haja mancà. Quai saja impurtant per bajegiar si ina relaziun cun la clientella.
Cun sa posiziunar cleramain avess l'hotel senz'auter chattà la clientella che va a prà. Perquai è il president da Hotelleriesuisse era da buna speranza che l'hotel haja in futur cun ils dretgs possessurs e possessuras. Il bajetg saja fitg bel ed haja potenzial. Impurtant saja simplamain da chattar la dretga purschida che distingueschia il Waldhaus d'auters hotels.
Quant spert ch'i giaja uss fin ch'in cumprader saja chattà saja grev da dir. Quai dependia da blers factur. En scadin cass fissi fitg donn ed ina gronda perdita per il Grischun sch'il Waldhaus giess en decadenza. Andreas Züllig è dentant da buna speranza ch'i vegnia chattà ina schliaziun, e che l'era dal Hotel Waldhaus a Flem na saja betg anc a fin.
Gia dapi intgin temp datti difficultads
Gia dapi il zercladur è l'hotel serrà parzialmain pervia da stretgas finanzialas. Dapi intgins mais saja la Z Capital Group gia sin la tschertga da cumpraders e cumpradras tenor «Hotel Inside».
Er il chantun ha enconuschientscha da la relaschada dal persunal. Envers il schurnal regiunal da SRF ha Gian Reto Caduff da l'Uffizi per industria, mastergn e lavur ditg che l'hotel Waldhaus haja annunzià envers l'uffizi la relaschada. In plan social per las emploiadas ed ils emploiads na giaschia betg en la responsabladad dal chantun. Las persunas pertutgadas possian s'annunziar tar l'intermediaziun da lavur per il cas ch'ellas restian senza lavur.
