La mesemna èsi vegnì enconuschent che l'hotel Waldhaus a Flem è en las stretgas. Uss scriva la vischnanca da Flem d'esser pronta da s’engaschar per vegnir a schliaziuns coordinadas. Ils davos onns haja dà pliras giadas discurs davart l’avegnir da l’hotel Waldhaus, scriva la vischnanca il venderdi en ina communicaziun. E Flem deplorescha il grond donn da reputaziun, cun l'hotel ch'è serrà per in temp.
Speranza per megliers investiders
Jo Müller ha manà l’Hotel Waldhaus dal 1982 fin il 2000. Uss è el pensiunà e tgira anc il museum da l’hotel. La situaziun mumentana è ina surpraisa per l’anteriur directur. Envers RTR ha el ditg, el na possia betg chapir co ch'i saja pussaivel da far uschè blers sbagls en in uschè bel lieu sco Flem.
Tenor Jo Müller n'han ils investiders americans da la firma «Z Capital Group» betg manà l’hotel cun cor. Il profit saja stà il pli grond motiv.
I na po betg esser ch’i vegn decidì a New York en in biro d’advocats – ina strategia per in hotel a Flem che ha 146 onns.
Uss spera Jo Müller sin novs investiders, sche pussaivel svizzers e gea betg tals da la China ubain d’auters pajais. I dovria investiders che van cun il cor vi da la chaussa. Per Flem e la regiun fissi numnadamain ina gronda sperdita sche l’hotel serrass per adina sias portas.
Memia blers midaments, memia pauca persunalitad
Il president da Hotelleriesuisse Grischun Ernst Wyrsch deplorescha il svilup en connex cun il Waldhaus. Ina surpraisa na saja quai dentant betg. Tenor el manca dapi 10 onns in manaschi constant che maina la fatschenta cun ina tenuta persunala e che s'identifitgescha cun la regiun ed ils indigens.
Il stabiliment sez saja però tuttina anc ina perla che saja impurtanta per la regiun e per tut il chantun. Ernst Wyrsch è persvas che l'hotel da tschintg stailas possia funcziunar a moda rentabla, sche la direcziun vegn adattada. Dasper ina nova direcziun dovria dentant l'emprim novs meds finanzials.
Sin las vias da Flem hai dà reacziuns da surpraisa e trumpada, cura che RTR ha dumandà intginas persunas:
Annunzià amez la stagiun
L'hotel Waldhaus ha annunzià la mesemna en ina communicaziun a las medias, ch'el haja instradà ina procedura da consultaziun. Tenor il dretg d'obligaziuns è quai il davos pass avant mesiras pli rigurusas, tge che munta che l'hotel stat curt avant stuair relaschar ina gronda part dal persunal. Che l'hotel ha annunzià uffizialmain questa procedura, ha era Gian Reto Caduff da l'Uffizi da lavur chantunal confermà envers RTR. Uschia haja il persunal almain la pussaivladad da vegnir cun schliaziuns, avant che las plazzas vegnan visadas.
Ils responsabels da l'hotel Waldhaus n'han betg prendì posiziun davart la situaziun actuala envers RTR. Co i va vinavant cun l'hotel, san ins sin il pli baud fin settember. Gia il favrer passà aveva l'hotel dà giu il label da «Bonvoy Autograph Collection» da la chadaina d'hotels Mariott per pudair spargnar.
Or da l'archiv:
L'hotel ha ina lunga istorgia, che RTR ha prendì sut la Marella:
