Trun! Trun! Trun! Gl’entir mund tschontscha mo da Trun. E cun tutta raschun: Trun ei e stat ina fontauna da prominenza. Persunalitads, sanctuaris, arbagias, tut a dubel e senza fin. Gie, caras liAurs, vus essas ils pli gronds. Respect. Chapeau. Enclin.
Bien, pil Zarli, pader Placi e Casper liun, no problem. Anzi, giustificauissim. Ils VIPs halt. Cuort Ligia Grischa, Ogna, Nossadunna dalla Glisch, idem. Aber … in ischi, mann! Tuttina. Far sirup ordlunder sco ils Canades va gie aunc, aber co san ins venerar en quella moda e maniera in ischi? In toc plonta marscha, inanimada e senza cor? Ch’ei dat pér aunc mellis e mellis dalla medema specia, dapertut entuorn. Minimum aschi gronds, e bials, e vegls. Na, sorry, quei ei surfatg. Overdose. E per esser sincers, egoistic. Auters valan lu nuot, ha? Ils Suworows da Pigniu, per exempel, ni las Valerusas da Porclas, la claustra e l’Acla da Fontauna – tut mo ina pipa tubac?
Encunter vus ha gnanc Glion, the one and only marcau en Surselva, ina schanza. Anzi. Vies showmaster leu, vus saveis schon, il Crestomat Cuacavagl dad RTR, ha schizun detg che Glion seigi il Domat dalla Surselva! Fagei quen, miu «Iliande, nur du allein, bist meines Herzens Sehnsucht am jungen Rhein» (Toni Halter)! Nundetg, neve? Aber mo per dir, senza Glion dessi ni ischi, ni fiasta da 600 onns, ni nuot. Viu strentgamein historic, also tenor burgameinas, sigils ed uorden, ei Trun nuot auter ch’ina paupra copia, in clon. Da Glion! Brutal, aber ver eisi, giegliez!
Ed è ils quachis da Domat ston lu per cass buca seturpegiar. Ni veis vus, zun benedidas liAurs, forsa en vossa reserva da promis ina «kanonenmaid» sco l’Onna Maria Bühler? Che ha spazzau naven ruczuc e tut persula in entir battagliun da schuldada franzosa? Mo cun smanis e «tschu-tschus» da bagordas da tscheiver. – Gie, ils quachis han eba è inga migale song da heroxs. Buca per nuot ein tycoons (e tycoonas!) industrials, (ex-)menaders politics, (ex-)banchers e litterats da num e pum secasai – da libra veglia – en quella biala vischnaunca agl ur dil Rein. E lu pér – TARATATÀ – tusch da tschinellas e uerbel da schumbers (da Domat, secapescha): Nemo! Il grond victur digl ESC. Nua dat quei bien Nemo siu sulet concert el Grischun? Precis, a Domat. Oh, yeah.
Quei ei ferm tubac, neve? Paupras liAurs. Cheu datti mo ina: in quintin vuclina ex, e suren aunc dus treis shots röteli (tenor il cussegl da Crestomat Cuacavagl), lu serrar ils egls ed emblidar.
