Il tren rampluna normalmain sin ils binaris tras il center da Glion, e quai in pèr giadas a di. Sco usità va el sper ils autos via che spetgan tar la barriera en la Via centrala. Gievgia saira era il mund dentant stà in zic sutsur: Il vagun è ì sin la via atras Glion, davent da la zona d'industria en la Via Santeri, tras la Via da la scola per sa tschentar tar la plazza da sport a Fontanivas.
Il viadi d'in tren sin via
-
Bild 1 von 7. Ils transportaders han auzà il vagun sin in camiun spezial. Bildquelle: RTR.
-
Bild 2 von 7. Il vagun sto vegnir fixà bain. Bildquelle: RTR.
-
Bild 3 von 7. La polizia communala davanttiers, il camiun cun tren sin dies suonda. Bildquelle: RTR.
-
Bild 4 von 7. Auto da posta ed il camiun cruschan en la Via Schlifras. Bildquelle: RTR.
-
Bild 5 von 7. La tschaghegna che po auzar varga 80 tonnas auza il vagun da viafier. Bildquelle: RTR.
-
Bild 6 von 7. Anc in pèr meter enfin la staziun finala, sper la nova plazza da pumptrack. Bildquelle: RTR.
-
Bild 7 von 7. Vagun sin il plaz da catram a Fontanivas. Bildquelle: RTR.
Nov lieu per occurrenzas
Tgi ch’è ì sper la zona d’industria a Rueun ora, ha forsa remartgà ch’i aveva dapi onns in vegl vagun cotschen sin l’areal da la firma Bianchi Bau. Atgnamain aveva la firma en il senn da far or da quel vagun in lieu da pausa per ils collavuraturs. Quai n’è dentant betg ì en vigur. Uschia haja l’uniun «A Glion» dumandà il mainafatschenta Fabio Bianchi sch’el mettess a disposiziun il vagun, declara il co-president da l’uniun, Gian Marco Bianchi. Uschia ha la firma da bajegiar regalà il char da viafier a la vischnanca da Glion.
Il transport dal vagun han las firmas da transport fatg per in pretsch favuraivel per la vischnanca. E lezza da sia vart surpiglia il vagun cun ils custs da mantegniment e manaschi. En l'avegnir duessi dar in lieu per occurrenzas publicas, ma surtut era in lieu per glieud giuvna.
En il rom da la planisaziun dal Pumptrack avain nus adina puspè discutà e nus essan vegnids sin l'idea ch’il vagun da tren fiss ideal per quel intent.
A Glion Fontanivas datti en l’avegnir pliras midadas ed investiziuns. Tranter auter è il parc da pumptrack, che l’uniun «A Glion» ha per gronda part finanzià, bainprest pront. Daspera construescha la vischnanca in parc da skateboard. Plinavant vul il US Schluein Glion construir ina nova plazza da ballape cun pastget artifizial. Sche tut va tenor plan, en las lavur sin la plazza da sport e temp liber Fontanivas finidas la proxima stad.