Las vischnancas da Tavau e Claustra han consultà lur segundindigens cun in questiunari digital. Passa 1'800 persunas che possedan in'abitaziun secundara en quels dus lieus han emplenì ora il questiunari.
In terz dad ellas han gia ponderà da midar dimora ed abitar permanent en in dals dus lieus. Radund 40% pon s'imaginar da sustegnair il provediment d'abitaziuns pajablas, per exempel cun metter a disposiziun abitaziuns u terren da bajegiar.
Las proximas emnas vulan gruppaziuns da focus sa fatschentar pli detaglià cun las respostas. Ins vul discutar emprimas mesiras e preschentar quellas il december. Quai è part dal project «Svilup dal territori persistent 2020 – 2024» che vegn sustegnì dad otg uffizis federals, da l'Uffizi per il svilup dal territori e l'Uffizi per economia e turissem dal Grischun, da las regiuns Alvra e Purtenza/Tavau, dal Parc Ela e da la fundaziun «Age».
